Directora di Coördinatie Centrum Mensenhandel Mensensmokkel Aruba:
ORANJESTAD (AAN): Jeannette Richardson-Baars, Directora di Coördinatie Centrum Mensenhandel Mensensmokkel Aruba (CMMA) a duna di conoce diabierna durante un rueda di prensa cu aworaki no tin casonan specifico relaciona cu trampanan online.
El a bisa cu por e mayornan no sa of cu nan sa pero nan no kier raporta esaki door cu por ta nan no ta califica e situacion como traficacion di hende. Esey tambe ta un posibilidad.
E ta enfatisa cu e ta spera cu door cu CMMA ta pone mas atencion riba dje cu toch e mayornan of e docentenan ta bin mas dilanti y contact nan pa tin un combersacion pa sa si ta un caso di traficacion of no, a indica.
Richardson-Baars a agrega cu traficacion di hende no necesariamente mester tin envolvi un transporte den dje. Si ta papiando di un boto riba lama, mas tanto e ta contrabando di hende y ta riba un otro echo.
Pero traficacion di hende den e forma digital por tuma lugar tur caminda na mundo pasobra e no mester ta algo fisico, a remarca. For di un distancia mes, por explota un persona y fors'e pa haci cosnan cu e no kier haci. Esey ta un risico real cu no mester tin necesariamente un contacto fisico, a splica.
E representante di CMMA a sigui bisa cu e campaña cu nan ta lansando ta pa hoben y mayor (wela y welo tambe). Tin un variacion den e material cu ta wordo ofreci.
Ta wak tendencianan nacional y tambe internacional locual kiermen cu hopi informacion ta yega cerca CMMA. Semper cu algo nobo ta yega, CMMA ta haci un check pa wak si esey por ta un situacion cu por sosode na Aruba tambe y esaki ta un di nan.
A remarca cu aunke no tin denuncianan haci, ta pensa cu miho preveni esey, cu e ta sosode na Aruba of cu e ta bira mas grandi akinan. Pesey nos a cuminsa cu un campaña pa eigenlijk preveni pa hobennan di Aruba ta cay den e trampa ey", a bisa.
Ta spera cu na momento cu hende haya sa di algun caso of un risico, den caso di un mucha y te hasta di un adulto, cu nan ta bin dilanti y duna CMMA e informacion ey, Jeannette Richardson-Baars a finalisa bisando.
