ORANJESTAD (AAN): Diabierna ultimo e director di Banco di Caribe, Sr. Giovanni Croes,
a haci entrega di varios “gift bon” na directora di Fundacion Pa Nos Comunidad (FPNC) Sra. Gianaika van der Biezen. E “gift bon” aki lo wordo reparti na e muchanan cu ta registra na FPNC bishitando 4 diferente scol, cual ta Pius X,
Fatima College, Felipe B Tromp y Colegio Bon Bini.
Tur aña e necesidad pa material y unifom pa scol ta creciendo y pa nos muchanan por cuminsa nan aña escolar bon prepara, Banco di Caribe a opta pa duna un man y regala varios mucha di diferente scol un bon pa nan por buscanan uniform. Cu e “gift bon” aki un mayor por busca 2 polo shirt, 1 carson cortico y 1 t-shirt pa haci gym.
Fundacion Pa Nos Comunidad ta yudando aproximadamente 300 - 350 famia den necesidad, cu pakete di alimentacion pa e ultimo 14 añanan. FPNC su mision ta preveni y combati pobreza, stress emocional y exclusion social.
E fundacion ta promove participacion, cuido di pobreza y bienestar general na Aruba desde 2009. Como un “non-profit organization” fundacion ta depende completamente di fondo y donacion, pa por keda opera. FPNC ta traha cu mas di 40 otro organisacion social riba e isla di Aruba. Organisacionnan manera: Departmento di Asuntonan Social (DAS), Fundacion Cas Pa Comunidad Arubano (FCCA), Wit Gele Kruis (WGK) etc. E fundacion ta opera cu personal full-time emplea y boluntario, cu ta compromete pa yuda nos comunidad, particularmente e famianan den necesidad cu ta registra pa alimento y articulonan di necesidad basico.
E compromiso di Banco di Caribe cu e comunidad Arubano ta consistente y ya pa hopi aña caba diferente fundacion y organisacion na Aruba por conta cu nan sosten. E banco ta desea tur hoben un aña escolar contento y educativo.
Riba e fotonan adhunto por mira unda director di Banco di Caribe Sr. Giovanni Croes y Marketing Officer Sra. Sue-Lan Liao Jen ta haci entrega di e “gift bon” na directora di Fundacion Pa Nos Comunidad Sra. Gianaika van der Biezen y e trahado social Sr. Gabriel Marchena
