Minister Geoffrey Wever:
ORANJESTAD (AAN): Ministerio di Finansa, Asunto Economico y Sector Primario a habri oficialmente un destaho publico pa cuatro contrato di servicio cu lo sirbi pa duna asistencia na e Departamento di di Agricultura, Cria y Pesca (DLVV) “Santa Rosa” pa por sigi brinda servicio den un forma mas rapido y alabes haci e trabounan necesario di renobacion y mantencion di diferente seccionnan den e Departamento. Esaki pa sigura e sosten necesario na tur e agricultornan, criadonan di bestia como tambe na e otro clientenan di Santa Rosa cu ta activo den Aruba su Sector Primario.
E contratonan lo tin un duracion di 36 luna y e trabounan lo ser coordina door di e gerencia di Santa Rosa y evalua regularmente hunto cu e Ministerio di Sector Primario. Esaki cu e meta pa sigura cu nan ta wordo ehecuta cu calidad.
E destaho publico aki tin como meta pa tuma un otro paso den e plan di Gabinete AVP-Futuro pa fortalece Aruba su Sector Primario. Cu e cuatro contratonan aki, Santa Rosa lo tin mas capacidad pa responde na e necesidadnan di servicio na e comunidad agricola y sigui brinda e sosten cu agricultor y criadonan di bestia ta conoce y aprecia.
E cuatro contrato ta cubri diferente tipo di trabou cu Santa Rosa ta haci regularmente. Pa locual ta trata e necesidad di mehoracion na e Departamento mes, lo bay ehecuta trabounan di mantencion di edificio y infrastructura, plomeria, electricidad basico, welding y instalación di sistema di irigacion den área nan di plantación pa menciona algun.
Tambe lo tin trabounan di cuido diario di bestianan, preparacion di tera, trabou cu ekipo pisa, transporte di awa, y gordura, mantencion di damnan, control di plaga, cosecha y otro trabounan agrario pa asina trece un mehoracion den e diferente sección nan di e Departamento y alivia e peso cu actualmente tin pa cu e necesidad cu tin na e momento nan aki. E ploegnan lo traha tanto riba e tereno di Santa Rosa como ariba tereno nan pa ehecuta diferente trabounan cu Santa Rosa ta ofrece na su clientenan.
Esaki ta nifica cu Santa Rosa lo bay beneficia di por hana e upgrading necesario pa mehoracion di e infraestructura existente cu tin hopi necesidad pa renovación. Trabou nan cu actualmente tin urgencia cu ne ta por ehempel trabounan di welder un cura despues cu el a kibra, mantención di stal , trabou cu ekipo pisa na cunucu nan cu mester wordo prepara pa planta of tin necesidad di ekipo pisa pa trabo unan di mantención etc.. Santa Rosa lo ricibi e upgrading necesario mediant e servicio di e contratista nan aki.
Un punto importante pa menciona ta, cu hopi di e servicionan cu Santa Rosa ta brinda ta wordo subsidia door di Gobierno. Esaki ta permiti agricultornan y criadonan di bestia ricibi sosten profesional na un prijs accesibel. Door di amplia e capacidad di Santa Rosa, Gobierno ta inverti directamente den nos productor localnan y asina logra establece un Sector Primario mas fuerte y bon ekipa.
Minister Geoffrey Wever a indica cu e meta principal ta sigui mehora e servicio cu Santa Rosa ta brinda na e comunidad, fortaleciendo asina e Sector Primario di nos isla.
"Nos kier pa agricultornan y criadonan di bestia por haya e yudansa y sosten cu nan merece, ora nan mester di dje. E contratistanan aki lo duna Santa Rosa mas capacidad pa atende mas peticion y sigui brinda e servicionan cu nos productornan local ta conta riba dje pa sigui traha y produci. Inverti den Santa Rosa ta inverti den nos seguridad alimentario, den nos economia y den futuro di Aruba."
Companianan cu tin e experiencia y capacidad pa ehecuta un of mas di e trabounan por participa den e destaho. Nan por inscribi pa un, varios of tur cuatro contrato, dependiendo di nan experticio. Por download e documento completo cu e condicionnan di participacion for di 8 di juli 2026 na e siguiente link https://bit.ly/4piVtco. Preguntanan por wordo manda te cu 22 di juli 2026, mientras cu ofertanan mester wordo entrega no mas laat cu 18 di augustus 2026 pa 10:00 di mainta na oficina di Santa Rosa na Piedra Plat 114-A.
Cu e destaho publico aki, Ministerio di Finansa, Asunto Economico y Sector Primario ta sigui construi un Departamento di Agricultura, Criansa y Pesca mas resiliente , cu por atende mas cliente, brinda miho servicionan y sigui ta un aliado confiabel pa tur esnan cu ta contribui diariamente na e desaroyo di nos Sector Primario.
{gallery}A inicia destaho publico pa yuda Santa Rosa, agricultor y criado di bestia{/gallery}
