Titula ‘Shifting Gears and Accelerating Our Path Forward’
ORANJESTAD (AAN): Aruba Airport Authority N.V. (AAA) ta orguyoso pa anuncia e publicacion di su Relato Anual pa aña 2025, resaltando un aña defini pa transicion cu proposito, ehecucion disciplina y progreso acelera pa metanan strategico a largo plaso.
Bao di e nomber “Shifting Gears – Accelerating Our Path Forward” e rapport di aña 2025 ta refleha e compromiso continuo di AAA cu excelencia operacional, sostenibilidad y pa fortalece su rol como e impulsor clave di economia y conectividad di Aruba.
Na aña 2025, AAA a atende cu un periodo di transicion di liderazgo, manteniendo un desempeño operativo solido y impulsando un desaroyo fundamental di infrastructura. E organizacion a mantene enfoca riba su vision a largo plaso pa bira un di e aeropuertonan mas sostenibel, sigur y cla pa futuro den e region di Latino America y Caribe.
E rapport ta delinea progreso den e prioridadnan strategico di AAA, incluyendo desaroyo organizatorio, calidad di servicio, innovacion y sostenibilidad. Mientras cu e aumento den demanda di pasahero y presionnan continuo di infraestructura a presenta retonan operacional, e apertura di Gateway 2030 Fase 1A a aporta na mehoracionnan den fluho di pasahero, particularmente p’e biaheronan cu ta bayendo Merca, mientras cu AAA ta sigui fortalece su basenan regulatorio y operacional.
E puntonan clave di aña 2025 ta inclui: (*) Mas cu 3.4 miyon pasahero a biaha for di Aeropuerto AUA, resaltando e alcance di su operacionnan y e calidad di su servicionan. (*) Finalisacion exitoso y lansamento operacional di Gateway 2030 Fase 1A, incluyendo un sala nobo di check-in y sistema avansa di maneho di maleta. (*) Aceleracion di Gateway 2030 Fase 1B y preparacion pa Fase 2, locual ta contribui na expansion y modernisacion di capacidad a largo plaso.
Tambe tin: (*) Satisfaccion di e pasahero a mantene fuerte, cu puntuacionnan alcansando 4.12 y nivel di satisfaccion di 3.99 (riba un escala di 5 punto). (*) Crecemento continuo den conectividad aereo y asociacion di companianan di aviacion, reenforsando e posicion di Aruba como un porta regional clave.
Retonan clave cu a atende na aña 2025 ta: (*) Maneho di aumento di volumen di pasahero memey di limitacionnan den infrastructura. (*) Respalda transicion di liderazgo y fortalece e structuranan di liderazgo. (*) Atende cu e rekisitonan di certificacion “aerodrome”, resultando den certificacion di 1 aña mientras ta haci algun ahustacion.
Ademas AAA a tuma pasonan significativo pa sostenibilidad, incluyendo e introduccion di un Environmental Management System (EMS) y progreso continuo bou di e standardnan internacional, reenforsando su compromiso cu operacionnan responsabel di aeropuerto y proteccion di nos medio ambiente.
James Fazio, CEO Interino di AAA, a menciona den e Relato Anual 2025: “Aña 2025 tabata un aña di transicion y impulso. A pesar di cambionan di liderazgo y demandanan operacional creciente, nos a mantene nos mes enfoca riba logra progreso. Nos logronan ta refleha e dedicacion di nos team y partnernan y ta posiciona AAA strategicamente pa futuro mientras cu nos ta acelera Gateway 2030 y ta fortalece nos resiliencia operacional y financiero.”
Iniciando januari 2026, AAA a yama bonbini na su CEO nobo; Jonny Andersen, demostrando un fase nobo di stabilidad di liderazgo y claridad strategico pa e organizacion.
AAA ta invita tur stakeholder, partner y comunidad en general pa mira e Relato Anual 2025 cu ta disponibel na e website aki:
Ademas di e Relato Anual, AAA ta sigui avansa su iniciativanan di Environmental, Social, and Governance (ESG) y Corporate Social Responsibility (CSR), aportando na desaroyo sostenibel y compromiso cu e comunidad di Aruba.
https://diario.aw/categories/noticia/general/aruba-airport-authority-a-saca-nan-relato-anual-2025#sigProId48dac6b156
.
