Aruba a wordo escogi pa bira anfitrion di Reunion Anual di MOWLAC

Aruba ta cumpli 35 aña como miembro asocia di UNESCO

ORANJESTAD (AAN): Minister Xiomara Maduro a informa durante un Conferencia di Prensa cu Pais Aruba a conmemora 35 aña cu Aruba a bira miembro asocia di United Nations Educational, Scientific and Cultural Organization, UNESCO.

   UNESCO ta e organizacion di Nacionnan Uni cu ta traha riba tereno di educacion, ciencia, cultura, comunicacion y informacion. E meta final UNESCO ta pa crea un cultura di pas den mundo y sociedadnan den cua educacion, ciencia, cultura y comunicacion y informacion cu e ta pilarnan central.

   UNESCO su netwerk local y internacional ta habri pa dialogo, intercambio di idea, compartimento di conocimiento basa riba investigacion.

   Comision Nacional pa UNESCO y Secretariado: Pa alinea e trabaonan di UNESCO pa Pais Aruba a institui un Comision Nacional pa UNESCO (NUC) cu ta worde presidi pa e mandatario y tin como vice-presidente señoraAnnemarie Proveyer-Groot y como miembronan ta fungi sr.Peter Scholing, señora Regine Croes y sr. Siegfried Dumfries.

   Pa prome biaha Aruba tin un Secretariado formalisa cu un specialista pa cada un di areanan di trabao di UNESCO.

   E Secretariado ta consisti di señora Marushka Tromp, cu ta e Secretaris General di NUC, como specialista riba e tereno di Educacion, ta  señora Nora Eleonora, como specialista riba e tereno di Cultura señora Ruby Eckmeyer, como specialista riba e tereno di Ciencia Sr. Marck Oduber y documentalista di e Secretariado ta señora Suhail Zaandam.

   Scolnan asocia na UNESCO: Recientemente na Aruba cuatro scol a bira miembro di e network di ‘Associated Schools Network’ di UNESCO. E beneficio di e scolnan cu ta miembro ta cu nan ta worde inclui den tur actividad di e network internacional di UNESCO.

   UNESCO lo comparti informacion cu e maestronan, e muchanan por participa na actividadnan online y lo por crea denter di e topico un actividad na Aruba mes. Tambe Pais Aruba ta den proceso pa prepara un intercambio cu scolnan cu ta miembro hunto cu Curaçao y Hulanda.

   Aruba anfitrion di Reunion Anual di Mowlac: Minister Xiomara a comparti e bon noticia cu e Comite Regional di UNESCO di e programa ‘Memory of the World’ – MOWLAC, a acerca Pais Aruba pa ta anfitrion di e 22 reunion anual cu pa prome biaha ta worde tene na Aruba na luna di november. E dignatario a subraya cu e ta masha orguyoso di esaki ya cu MOWLAC a scohe Aruba pa motibo cu Pais Aruba ta e pionero riba tereno di digitalisacion y presentacion di su herencia documental.

   Pa e mesun motibo aki Aruba a haya asiento den e Comite pa e proximo 4 aña. E tema di herencia documental ta esencial pa discusionan riba escohencianan pa futuro. Minister di Cultura a informa cu profesionalmam di Biblioteca Nacional Aruba, Archivo Nacional Aruba hunto cu UNESCO ta trahando hunto pa organiza e reunion anual.

  Gradicimento: Minister Xiomara ta gradici cada un miembro di NUC, señora Annemarie Proveyer-Groot, sr. Peter Scholing, señora Regine Croes y sr. Siegfried Dumfries pa nan trabaonan eherce.Tambe e mandatario ta gradici cada un miembro di e Secretariado, señora Marushka Tromp, señora Nora Eleonora. sr. Marck Oduber, señora Ruby Eckmeyer y señora Suhail Zaandam pa nan dedicacion y bon trabao.

   Alavez Minister di Cultura ta yama danki na tur partnernan den nos comunidad cu a participa, sostene y implementa e trabaonan conforme UNESCO internacional.