Segun Rubin Ponson:
ORANJESTAD (AAN): Rubin Ponson di Departamento di Obranan Publico (DOW) y miembro di e Comision di Vuurwerk a indica cu tin reglanan pa loke ta e ponemento di containernan of puestonan pa benta di clapchi.
Tin un maneho cu ta bisa cu e lugarnan mester tin un distancia for di cierto sitionan. Manera distancia for di aeropuerto, for di gasolin station, misanan, etc. E distancia aki semper ta wordo teni na consideracion y e bendedornan mester cumpli cu ne, a señala.
Nan sa cu hopi di e puntonan di benta ta concentra den cierto distritonan mas hopi cu otro y esey ta a base di e populacion cu tin den e zona ey.
Ponson a bisa cu e bendemento tambe ta bay concentra hopi den esaki y ta wak cu berdad cu cierto camindanan tin mas punto di benta cu otronan. Pero esey ta keda na cada comerciante unda nan ta pone nan punto di benta, a remarca.
