ATA a duna resultado di bishitante
ORANJESTAD (AAN): Siman a cuminza, y Aruba Tourism Authority a revela informacion di e cantidad di turista cu a bishita Aruba durante Juli 2023.
Den luna di juli 2023 nos destinacion a ricibi un total di 111,862 bishitante “stay-over”. Si compara luna di juli 2023 cu juli 2019 - cu tabata e ultimo aña normal di turismo, por mira cu Aruba a recupera 108% di locual a worde ricibi na juli 2019, cu ta indica un crecemento di 8%. Si compara juli 2023 cu juli 2022 por wak un crecemento di 3%.
Promedio di patronchi di gasto: Esaki ta e patronchi di gasto pa cada bishitante den di dos cuartal di 2023. Visa Credit card su promedio den gasto pa cada cardholder a yega na un suma di $625 den Q2 si compara cu $667 den Q1 2023.
Carchi di Mastercard su promedio den gasto pa cada cardholder a yega na un suma di $691 den Q2 si compara cu $740 den Q1 2023.
Mercadonan y categorianan di acomodacion: Den juli 2023 83% di e total di e bishitantenan “stayover” pa Aruba a bishita for di Norte America, 6% a bishita for di Europa, 9% a bishita for di Latino America y 2.4% tabata procedente di otro partinan di mundo.
Mirando e categorianan di acomodacion, den juli 2023 27.5% di bishitante a keda den hotelnan European Plan, 17.7% a keda den hotelnan All-Inclusive, 29.5% a keda den Timeshare y 25.2% a keda den otro tipo di acomodacion, conoci tambe como vacation rentals.
Papiando di Vacation Rentals: Ta importante pa menciona cu A.T.A. tin acceso na un plataforma unda por wak e cantidad di cas, apartamento y villas cu ta worde uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera.
Si compara juli 2023 cu juli 2022 por wak cu e prijs promedio di e acomodacionnan aki a crece cu 10%, for di un prijs promedio di $233 pa anochi na juli 2022 pa un prijs averahe di $257 na juli 2023.
Si compara juli 2023 cu juli 2019, por wak cu e prijs averahe di e acomodacionnan aki a crece cu 66.5%, for di un prijs promedio di $158 pa anochi na juli 2019 pa un prijs averahe di $260 na juli 2023.
Si compara juli 2023 cu juli 2022 por wak cu e ocupacion averahe di e acomodacionnan aki a disminui cu 3.1 punto di porcentahe, for di un promedio di 50.6% na juli 2022 pa un averahe di 48.7% na juli 2023. Si compara juli 2023 cu juli 2019 por wak cu e ocupacion promedio di e acomodacionnan aki a crece cu 8.2 punto di porcentahe, for di un averahe di 44.9% na juli 2019 pa un promedio di 53.1% na juli 2023.
Den caso di entrada, si compara juli 2023 cu juli 2022 por wak cu e categoria a genera un crecemento den entrada di 30%. Si compara juli 2023 cu juli 2019 por wak cu e categoria a genera un crecimento den entrada di 193%.
Prome siete lunanan di 2023: For di 1 Januari te cu Juli 2023, Aruba a ricibi un total di 722.444, bishitante “stayover”, esaki ta un crecemento di 6.4%, compara te cu juli 2019, unda a ricibi 679,113 bishitante “stayover”.
Si compara e prome 7 lunanan di 2023 cu e prome 7 lunanan di 2022, por wak un crecemento di 13.4%, bayendo for di 637,331 bishitante “stayover” pa 722.444 bishitante “stayover”.
Cantidad di turista na Juli 2023 pues pa Aruba ta 111.862 turista. Recien DIARIO a publica e cifra pa Curaçao, cu a haya 50.936 turista den Juli 2023. Tambe a menciona cu Bonaire a ricibi 14.133 turista den Juli 2023.
