Minister Rocco Tjon cu un gran pabien pa Cuerpo Policial:
*Pa 2023 te awe tin dos caso so registra y un di nan resolvi!
ORANJESTAD (AAN) – Minister di Husticia, Rocco Tjon, a presenta e tabelnan cu e cifranan di Criminalidad na Aruba, entre 2018 te actualmente, y el a subraya cu encuanto incidentenan di tiramento por wak un reduccion drastico, e mandatario a remarca.
Na 2021 Aruba a conoce 19 incidente, na 2022: 21 incidente, y aworaki tin solamente 5 incidente. E dignatario a señala cu esaki ta un desaroyo hopi positivo; y unda cu incidentenan cu arma blanco ta wordo uza tin un reduccion tambe: aña pasa tabata tin 13 y e aña aki tin solamente cuater, te e momentonan aki.
Y pa loke ta trata botonan cu ta bin Aruba cu contrabando y cu hende, na 2018, cu ainda KPA no tabata tin radar, apenas e prome tabata den proceso di wordo cumpra, a registra 33 caso y aworaki tin 13 pa loke ta e aña aki. Aworaki e botonan ta wordo intercepta manera Diadomingo mes a sosode y esaki tin di haber cu inversionnan den tecnologia cu ta tumando lugar y e diferente reunionnan strategico cu ta sosode entre tur e diferente departamentonan.
E dignatario a señala cu den algo asina importante manera atraco, e ta hopi orguyoso di e desaroyo actual y a expresa palabranan di pabien grandi na Cuerpo Policial, pasobra despues cu na 2018 tabata tin 36 atraco y na 2019 tabata tin 50, e reduccion a cuminza tuma lugar na 2020 cu 45 caso, 2021:30, 2022:20, y pa loke ta te aworaki na 2023 tin solamente dos. Tjon a agrega cu un, di e dos casonan aki, a wordo resolvi.
Otro aspecto hopi importante ta e cantidad di tironan cu ta wordo scucha, unda hopi biaha tin melding di un ciudadano cu yama na KPA, bisa cu e ta kere cu a scucha tiro. “No tur ora por confirma esaki pasobra por ta otro sonidonan tambe, pero tur ta wordo registra. Na 2021 tabata tin 66 melding riba esaki, y awo, te e momentonan aki tin solamente 15; aña pasa tabata tin 42” e dignatario a menciona.
Minister Rocco Tjon a reitera cu esaki ta danki na un combinacion di diferente factor, entre otro, decisionnan strategico cu ta wordo tuma, inversionnan cu ta wordo haci pa e personanan tin e material necesario, e tecnologia tambe pa nan por conduci investigacionnan cu un resultado positivo, pero hopi importante ta e proyecto di camara cu na final di dia ta yuda preveni y ora algo sosode, e chens pa e casonan aki wordo resolvi, ta mucho mas grandi.
Minister Tjon a señala hopi importante tambe ta e informacion cu ta wordo comparti entre e departamentonan concerni mes. E base di tur cos ta “Informatie-Organizatie” (Departamento di Informacion) y a remarca cu e inversionnan lo sigui tuma lugar.
