Hues ta mustra cu ta Formador mester a tuma un decision
ORANJESTAD (AAN): Diaranson mainta Hues a dicta sentencia den e caso LAR cu Mike de Meza a cuminsa contra Director di Departamento di Impuesto (DIMP). Hues a bay hopi amplio den su sentencia, mustrando cu e no ta autoriza pa tuma un decision riba e carta di DIMP. Tambe Hues ta mustra cu ta Formador, for momento cu el a haya e carta di DIMP riba e comportacion di de Meza pa cu belasting, mester a tuma un decision.
Evaluacion di hues: Hues den su evaluacion ta mustra cu e no ta autoriza pa tuma un decision riba e protesta di de Meza contra e postura di DIMP di no kier duna un carta liber di impuesto. Hues a mustra cu un caso Lar, ta riba decisionnan tuma pa Gobierno y e ta haya cu den e caso aki e cartanan di DIMP no valido pa bay den protesta.
Hues a bisa cu e cartanan ta informacion cu DIMP a manda pa Formador y no ta un decision si de Meza por bira minister of no.
Hues a bisa cu de Meza no ta bay haya loke el a demanda esta pa Hues ordena e director di DIMP pa traha un carta di belasting na fabor di de Meza.
Formador mester tuma decision: Hues ta mustra cu director di DIMP ta haya cu de Meza tin un deber moral y etico pa cumpli cu debe di belasting. Aunke cu no por bay cobra e belasting pasobra e periodo a caduca. Tambe Hues ta mustra cu de Meza a paga belasting riba cosnan cu tabata pendiente.
Hues a sigui mustra cu Formador (Promer Minister) ta dispone di e cartanan aki. Na opinion di Hues, ta Formador ta esun cu mester tuma un decision. Hues ta mustra cu ta keda na Formador pa aplica articulo 8 di Landsverordening Integriteit Ministers (LIM) y nombra of no nombra de Meza como minister.
Decision: Hues su decision den e caso aki di LAR< a mustra cu cu e no ta autoriza pa tuma un decision. Hues ta rechaza e demanda di de Meza.
Defensa di De Meza ta desapunta: Por a compronde di parti di defensa di de Meza, cu nan ta desapunta cu Hues no a tuma un decision. E defensa ta haya cu aki no ta trata di e decision cu de Meza por bira Minister sino su derecho como ciudadano riba e carta liber di impuesto di DIMP.
Na opinion di defensa, ta parce cu Hues no tabata kier e responsabilidad pa indirectamente nombra un minister. Eynan defensa di de Meza ta evalua e siguiente pasonan. Pa defensa ta importante cu Hues a pone bon cla cu Mike de Mez no tin ningun problema, debe of algo pendiente cu DIMP. Solamente cu DIMP kier opina riba nombramento di un minister locual no ta DIMP su trabao. Mirando e decision di Hues, e defensa di de Meza ta conclui cu tin ningun motibo pa no nombra Mike de Meza como minister.
