Aruba a pone krans na Conmemoracion Nacional di e Abolicion di Slavitud 2025

ORANJESTAD (AAN)/Den Haag  – Na Oosterpark Amsterdam a tuma lugar awe riba 1 di juli e conmemoracion Nacional di e Abolicion di Slavitud

dor di Hulanda na 1863 den e colonianan Surnam y Antianan Hulandes; e aña aki 162 aña pasa. Directora di Gabinete di Minister Plenipotenciario di Aruba Joselin Croes LL.M/M.Sc a pone un krans den nomber di Gobierno y pueblo di Aruba.

Tradicionalmente un miembro di Gobierno di Hulanda ta tene un discurso y e aña aki a toca turno na Minister-presidente demisionario Dick Schoof. Tambe burgemeester di Amsterdam Femke Halsema, ex-prome minister di Sint Maarten Silveria Jacobs y vice president di NiNsee Wendeline Flores a tene un discurso.

E intermezzo musical a keda brinda pa Marinierskapel der Koninklijke Marine cu a toca e obra musical “Keti Koti Suite”, cu alabes tabata un premicia. Tambe tabata tin actuacion di Andro Biswane.

Despues di e discursonan tabata tin 1 minuut di silencio sigui pa e parti di ponemento di krans na e “Slavernijmonument”. Banda di Joselin Croes, tambe a pone un krans entre otro presidente di Eerste Kamer Jan Anthonie Bruijn hunto cu vice-presidente di Tweede Kamer Ton van der Lee, Minister Plenipotenciario di Curaçao Carlson Manuel, Minister Plenipotenciario di St. Maarten Gracita Arrindell, Embahador di Surnam Rajendre Khargi y burgemeester di Amsterdam Femke Halsema.

Di e Gabinete demisionario Prome Minister Dick Schoof y Minister di Asuntonan Interior y di Relacionnan di Reino Judith Uitermark a pone un krans.

NiNsee ta e instituto cu ta organisa e conmemoracion. E aña aki ta 23 aña cu NiNsee a keda funda y cu e conmemoracion a inicia cu desvelo na 2002 di e “Slavernijmonument” cu ta un obra di e escultor Erwin de Vries. 

E potretnan ta cortesia di Arubahuis