Debi cu mama di Natalee a haci denuncia na Amsterdam
- Na Hulanda ainda fecha di vencimento pa e delito di homicidio no a caduca
ORANJESTAD (AAN): Ministerio Publico di Aruba a ofrece na Ministerio Publico di Amsterdam (OM di Amsterdam) pa pone na su disposicion henter e dossier Arubiano di desaparicion di Natalee Holloway di aña 2005.
OM di Amsterdam mester di esaki pa evalua e denuncia di asesinato y/of homicidio cu mama di Natalee Holloway a haci ultimamente na OM di Amsterdam.
Ministerio Publico na Aruba a tuma nota riba 18 di October 2023 den media Mericano cu, na e estado di Alabama na Merca, Joran van der Sloot lo a confesa cu el a mata Natalee Holloway na 2005 na Aruba.
Relaciona cu esaki Ministerio Publico di Aruba a manda riba 19 di October 2023 un peticion pa asistencia huridico (un asina yama rechtshulpverzoek) riba 19 di October 2023 pa US Justice Department di Merca.
Den e rechtshulpverzoek aki a pidi asistencia pa haya tur documento cu por sirbi como prueba den e caso di desaparicion di Natalee Holloway, incluyendo e declaracionnan di Joran van der Sloot. A resulta cu US Justice Department di Merca a brinda cooperacion total y a entrega na januari 2026 un gran cantidad di e documentonan pidi na Ministerio Publico di Aruba.
Investigacion adicional di e documentonan suministra no a hiba, te na e momentonan aki, na pruebanan ni pa asesinato, ni pa homicidio. Considerando cu e delito di homicidio a caduca caba na Aruba, no ta posibel mas pa persigui Joran van der Sloot penalmente na Aruba pa esaki.
Durante luna di Maart mama di Natalee Holloway a haci denuncia na OM di Amsterdam di asesinato/homicidio contra Joran van der Sloot.
Debi na e hecho cu e fecha di vencimento pa e delito di homicidio a caduca na Aruba y mirando e denuncia cu recien a wordo haci na Hulanda, Ministerio Publico di Aruba lo pone e dossier na disposicion di OM di Amsterdam. E fecha di vencimento no a caduca ainda na Hulanda. Considerando ademas cu ta trata di un sospechoso Hulandes, persecucion penal na Hulanda lo ta en principio posibel.
Ministerio Publico di Aruba lo no haci ningun declaracion mas tocante preguntanan huridico awor cu ta OM di Amsterdam cu lo dicidi riba e denuncia.
