ORANJESTAD (AAN): E colaboracion entre Hulanda, Aruba, Curaçao y Sint Maarten den e Paketenan di Pais,
e ultimo añanan a contribui berdaderamente pa pone e reformanan cuminsa cana. Esaki un comision di evaluacion independiente, cu e ultimo lunanan a haci investigacion, ta conclui. Reformanan structural ta pidi sinembargo mas tempo tambe, segun e comision.
Fin di 2020 a haci palabracionnan entre Hulanda y cada un di e islanan separa tocante e aporte financiero cu Hulanda a duna relaciona cu e pandemia di Covid-19. Esakinan tabata relaciona cu reformanan den gobierno. A ancra e palabracionnan tocante e reformanan den asina yama Paketenan di Pais. Desde comienso di 2021 Aruba, Curaçao y Sint Maarten ta trahando riba e reformanan aki. Den esey nan ta ricibi ayudo di e Organizacion di Trabao Temporal (TWO) di Ministerio di Asuntonan Interno y Relacionnan den Reino. Cu firmamento di e ‘Areglo Mutuo di Colaboracion pa Reforma’ na april 2023, e colaboracion aki a haya un base huridico.
E metanan di e Paketenan di Pais ainda ta vigente: Meta di e colaboracion, fortificacion di resistencia economico y capacidad administrativo di di e Paisnan, segun e comision, ainda ta vigente.
E Paketenan di Pais ta consisti di reformanan drastico riba hopi tereno. Di mehoracion di calidad di enseñansa y clima di inversion, te cu modernisacion di servicio di impuesto y servicio di gobierno.
Mester a prepara y ehecuta tur e reformanan aki pareu. Esaki en combinacion di capacidad di ehecucion limita na Aruba, Curaçao y Sint Maarten, cu e consecuencianan di e crisis di Covid-19, a haci cu e ehecucion a tuma hopi tempo y tabata compleho. Na mes momento e comision ta constata cu a bin movecion den e trayectonan cu anteriormente tabata dificil pa realisa. Esaki ta debi cu conhuntamente a determina cua proyectonan mester a ehecuta. E coordinacion tabata den man di e paisnan mes y nan por a conta cu sosten di TWO.
Distincionnan: E comision den su rapport ta enfatisa cu tin distincionnan entre Aruba, Curaçao y Sint Maarten. Asina e reformanan na Aruba ta forma parti di propio plannan di maneho.
Pa Curaçao ta importante pa bin claridad den e tempo binidero tocante compromiso atministrativo y cua reformanan tin prioridad. Sint Maarten tin como e pais mas chikito, e posicion di salida mas vulnerabel. Entre otro pasobra e capacidad di ehecucion ta mas limita ainda cu na e otro paisnan.
Den e lunanan cu a transcuri un comision independiente a evalua e colaboracion pa loke ta trata e Paketenan di Pais. E comision ta consisti di cinco miembro, nombra a base di nan profesionalismo. Cada un di e cuater paisnan a apunta un miembro di comision.
Presentacion di e rapport y e proceso siguiente: Dos siman pasa a presenta e rapport di e comision di evaluacion na e prome ministernan di Aruba, Curaçao y Sint Maarten y na Secretario di Estado di Asuntonan Interno y Relacionnan den Reino, Eric van der Burg.
Awor ta presenta e resultadonan di e evaluacion na Tweede Kamer y Staten di Aruba, Curaçao y Sint Maarten.
Esnan cu kier lesa Tweede Kamer su rapport di evaluacion y e Carta na Parlamento, por bay na e website aki:
DIARIO a compronde cu despues di zomer venidero, Gabinete ta bin cu un reaccion di contenido riba e conclusion- y recomendacionnan di e comision di evaluacion.
