Aruba a haya un pastoor local mas ora cu ordenacion di diacono Michael Nicolaas

ORANJESTAD (AAN): Riba Diadomingo atardi, casi no tabatin lugar mas pa sinta den Pro-Catedral San Francisco na Playa. 

Esaki tabata debi cu a tene ceremonia special di ordenacion di un pastoor mas di Aruba, esta Reverendo Edgar Charles Michael Nicolaas.

   E Ordenacion Sacerdotal di Diacono Michael Nicolaas a conta cu presencia di Arzobispo Charles Gordon, tur pastoor di Aruba, y e anochi a wordo guia pa e conocido Shon Pe Krozendijk.

   Tabatey presente Gobernador Alfonso Boekhoudt, tambe Prome Ministro Mike Eman, President di Parlamento Marlon Sneek, diferente Parlamentario tambe, y hopi laico y esnan di clero.

   Hopi ta conoce Michael Nicolaas kende den pasado tabata fungi como Director di Aeropuerto di Aruba.  Semper e tabata un persona yen di fe, y despues cu su señora a fayece y su yiunan ya ta grandi, e chens a habri pa el a bira Pastoor.  Hopi hende tin pleno confianza cu e lo fungi como un Sacerdote, cu pa hopi tempo ta un persona cu ta bon comunicador cu pueblo.

   Tabatin interes grandi pa presencia e ordenacion como Sacerdote, y varios persona a indica cu e tabata algo emocional y varios hende a haya lagrima den wowo.