Influenza no ta djis un simpel griep
ORANJESTAD (AAN): Pasobra Influenza no ta djis un simpel griep, e vacuna di Influenza lo ta disponibel den bario cuminsando 5 di november pa e grupo den comunidad cu ta na risico di bira hopi malo debi na Influenza. E grupo aki ta consisti di adulto mayor di 60 aña of mas y tambe di personanan menor di 60 aña pero cu ta sufri di malesa cronico of condicion di salud cu ta debilita nan sistema inmunologico.
E adulto mayor di 60 aña of mas ta bin na remarke pa ricibi e vacuna di Influenza completamente gratis y NO mester di recept di dokter di cas. E adulto mayor por ‘WALK IN’ na nos unidad mobiel den bario of na seccion di Malesanan Infeccioso situa na Avicenastraat#1 (patras di edificio di DVG) di dialuna pa diabierna for di 1.30-4.00 pm. Na momento di presenta e adulto mayor mester bin cu unicamente su carchi di AZV.
Personanan cu ta sufri di malesa cronico of nan salud ta debil pero NO tin 60 aña ainda tambe por ricibi nan vacuna completamente gratis, pero pa esaki si mester bin cu un recept di dokter di cas. Cu e recept e persona por ‘WALK IN’ na e unidad mobil den bario of na seccion di Malesanan Infeccioso di DVG di dialuna pa diabierna for di 1:30 pm pa 4:00 pm. Na momento di presenta mester bin cu e recept di dokter di cas y tambe su carchi di AZV.
Pa pashentnan cu limitacion mobil por ehempel den rolstoel, DVG tin servicio di vacuna den auto. Na yegada di e persona inmobil na nos localidad su familiar of dunador di cuido mester baha pa haci e parti administrativo y un enfermero di e seccion lo sali pafo pa brinda e servicio di vacunacion den auto.
Pa pashentnan na cama (bedlegerig) mester yama na 522-4200 pa inskribi pa e servicio na cas. Un enfermero di e Seccion di Malesanan Infeccioso lo yama back ta traha un cita.
Tur otro persona cu NO tin 60 aña y tampoco tin malesa cronico pero ta desea di ricibi e vacuna di Influenza lo worde informa den transcurso di siman na ki momento e vacuna ta disponibel pa cumpra.
