Darren van Ommeren di SMAC:
"Ta bay tin un carnaval grandi pa e pueblo di Aruba por gosa di dje"
ORANJESTAD (AAN): Darren van Ommeren, Presidente di SMAC a duna di conoce cu nan ta masha contento con tur cos ta bayendo pa loke ta Carnaval 71.
El a indica cu den weekend tabata tin Festival 53 di Tumba caminda a registra 18 cantante, 15 tumba, 3 tumba loco y 9 banda. Esaki tabata un adelanto compara cu 2024, mirando cu tabata tin 5 banda y 9 cantante. E aña aki e cantidad a 'doble-up' den cantidad di cantante y banda.
Riba diadomingo tabatin Parada di Fantasia na San Nicolas den oranan di atardi, esta 2 pm, el a bisa. A conta cu 6 grupo cu a sali for di Joe Laveist Ballpark y a finalisa bek na Joe Laveist pa un total di 4 ora di parada.
Aworaki a drenta den e luna di parada te cu 2 di maart. Tur fin di siman lo tin un parada cu entregamento di mando di Prins cu Pancho cu lo tuma luga dia 16 di februari.
Van Ommeren a laga sa cu 'Jouvert morning' ta bay den un prueba pa sali y caba na Carnival Village. Tur esaki ta den preparacion. Tin e permisonan caba, tambe e boluntarionan practicamente wardando pa e fechanan yega pa ranca saki.
El a agrega cu pa e paradanan di mucha oficial tin 7 grupo. Paradanan di hende grandi tin 9 grupo, 12 banda, un brassband.
'Kiermen ta bay tin un carnaval grandi pa e pueblo di Aruba por gosa di dje", Darren van Ommeren a expresa.
