ORANJESTAD (AAN): Dialuna lo ta promer biaha cu Aruba, Corsou, Boneiro y mundo lo scucha un tema nobo di e artista Krizs di Aruba den e genero di bachata.
Ta trata aki di un tema den e formato duo, hunto cu e arista di Corsou, Maxwell. Hunto cu e cancion lo sali tambe un video clip ariba tur plataforma manera YouTube, Spotify etc.
E dos artistanan Krizs y Maxwell a conecta cu otro digitalmente durante pandemia y a sigi comunica cu otro constantemente. Na dado momento a yega e oportunidad pa traha riba un colaboracion cu ta hiba e nomber di 'Bailar Contigo'. Ta trata di un storia skirbi pa Maxwell. E storia no a sosode cu e dos cantantenan mes, pero sinembargo ta algo cu ta pasa den bida real.
E exito nobo aki ta na spaño y ta den e genero contagioso di bachata. E areglo a keda den man di Anuar van der Linde, percussion Josue Kelly y Chris Kross riba guitara. Ambos cantante a graba nan voz na cada pais. Angelo Dopwell di Dopwell Music a graba e baho, mix y master e cancion.
Manera mayoria cancion awendia, un video clip no por haci falta. Den e caso aki Krizs a biaha bay Corsou pa asina por graba e clip hunto cu Maxwell. Aki e fotografo di Aruba Kenny Theysen tambe tabata presenta pa captura algun escena patras di cortina.
