Artista local Yahaira Maduro participando cu su obranan den show na Italia y Islanan Canario

ORANJESTAD (AAN): E siman aki, DIARIO a haya sa cu un artista local ta participando na un international art show na Milan (Italia) y Fuerteventura (Isla riba Oceano Atlantico).

   Despues di su exitoso segundo solo art show "Apasionada" cu a tuma lugar den December 2021 na Aruba, e artista visual Yahaira Maduro ta participa na otro exhibicion internacional na Europa di galeria Mads Milano.

   E galeria aki un biaha mas, mescos cu aña pasa, a extende un invitacion na Yahaira pa participa na nan exhibicion "Liquid Arsenal" di 28 di mei pa 3 di Juni 2022.

   Mads Milano ta un galeria renombra na Europa, cu  localidad den centro di Milano como tambe na Fuerteventura (Islanan Canario).

   E concepto di Mads Milano ta uno sumamente moderno, cu ta consisti di exhibicionnan fisico den combinacion cu virtual reality, e asina yama: "mixed reality". Esaki ta duna e espectador un experiencia unico. Alavez e artistanan cu ta participa na exhibicionnan di Mads Milano ta hanja exposure amplio rond mundo atravez di diferente medionan di comunicacion.

   Pa cu esaki e galeria ta conta cu un equipo grandi di mas o menos 40 curadornan di arte. Tambe Mads Milano ta publica un catalog extenso di tur nan exhibicionnan cu ta incluí biografía di cada artista, material visual y descripcion como tambe un analysis critico, di cada obra, hasí door di un curador di arte. Yahaira ta participando na e exhibicion "Fluid Arsenal" cu 3 obra abstracto den estilo di action painting cu ta e estilo cu mas e ta identifica su mes.

   DIARIO a haya sa, cu e titulonan di e obranan ta: True Colors, Fountain of Youth y Moon Water Magic. Yahaira ta e unico artista visual di Aruba cu ta participando na e exhibicion aki cu ta conta cu mas o menos 200 artista di tur parti di mundo.