ORANJESTAD (AAN) — Alonso Tromp a postula su mes pa e cargo di Presidente, of pa miembro di e Directiva di Sindicato TOPA.
Asina Tromp a declara den un entrevista cu DIARIO. El a postula su mes pasobra e kier yuda e sindicato bay dilanti. El a comenta cu e por a compronde algun tempo pasa, via e medionan di comunicacion, cu señor Bernabela no por a bin bek, mirando cu el a yega su maximo segun statuto. E ora ey el a pone su mes disponible mirando cu e tin e calidad y experiencia, pa yuda e sindicato.
El a bisa cu prensa por wak den su background con e ta hiba su campaña, y por haya folders. Tur cos el a prepara pa informa, incluso a pone business card den dje. Tur esnan interesa por haya e informacion, incluyendo su celular y email address.
Tromp a aclarea cu e no ta miembro di e directiva di TOPA, pero miembro di e sindicato desde 2008. E ta sinti cu tin falta di transparencia y informacion den e sindicato, y esaki ta algo cu e ta enfoca masha hopi riba dje, pasobra comunicacion ta esencial. El a expresa cu den cas, matrimonio, famia, si no tin un bon comunicacion tin problema. “Mi a haya e filling cu no tin un bon comunicacion entre e directiva actual di TOPA y e Presidente cu nos, como miembro, y mi kier trece cierto cambionan pe”, Alonso Tromp a subraya.
Tin cuater punto cu Tromp ta bay enfoca riba dje, cu ta: Husticia, transparencia, respet y defensa. “Defensa ta, defende y salvaguardia e derechonan di cada miembro igual”, Alonso Tromp a acentua.
El a agrega cu TOPA a haci hopi trabao y a trece hopi desaroyo nobo na Aruba. “Nan a defende e miembronan hasta cierto nivel. Pero si bo ta keda mucho largo den un posicion, bo ta kere cu bo so sa tur cos y ta lubida riba e pida di comunicacion, y naturalmente di e cuatro aspectonan cu mi a trece dilanti. Pesey mi ta boga y mi ta respeta statuto y mi ta super contento cu ta den statuto skirbi unda cu statuto ta papia cu un presidente por keda diez aña y cu no mag pase, pero nan a bin cu un Congreso y nan a logra alarga cu cinco aña y el a yega 15, y aworaki Rene sa cu e mester baha. Congreso a dicidi cu e aña aki nan kier bay eleccion”, Tromp a indica.
Alonso Tromp ta haya cu pa falta di informacion, cierto miembronan mes no ta haya suficiente informacion y nan a acerca su persona pa postula su mes.
