Artista di Aruba a participa na un Expo te na Paris

Bunita logro di Yahaira Maduro ---ORANJESTAD (AAN): E actividad tabata planea pa tuma lugar na Francia na fin di Januari 2021. 

Sinembargo debi na pandemia y reglanan existente e momento ey, esaki a wordo cancela.   Pero awor na September 2021 si el a tuma lugar.

   Esnan cu conoce, sa cu semper Yahaira tabatin un pasion pa arte.  Ultimo añanan por a mire ta pinta mas y mas, desaroyando su habilidad y dedicacion na esaki.

   For di chikito caba e tabata gusta pintamento, y semper a usa colornan briyante.  Despues di a studia y biba na Hulanda, el a regresa Aruba pa start su carera como un specialista Legal.  Pero toch arte a keda como un di su berdadero pasion y den su tempo liber a cuminza pinta bek usando principalmente acrilico y experimenta cu diferente estilo.  Su cuadranan a wordo cumpra y ta dorna hopi cas y oficina na Aruba, Bonaire, Curacao, y Hulanda.  El a hasta yega di diseña tarheta di mensahe, a crea costume pa carnaval, y a haci algun trabao pa e.o. Gobernador di Aruba y tambe Corte di Husticia.

   Yahaira Maduro a profundiza su mes awor mas den arte abstracto y tabata basa nan mes segun varios tema.  Pues e ta inclui e.o. colornan cu ta mas sobresali durante Carnaval, y asina e ta traha un cuadra abstracto cu e colornan ey.  El a sigui cu temanan asina, y a inclui un cuadra contemporaneo cu colornan di ambiente di anochi, otro cu colornan di ora bo sobrevivi un tormenta, baile harmonioso, etc.  E colornan keto bay ta vibrante y combinacionnan di colornan atrevido.

   Lo mas interesante ta e hecho cu aña pasa algun conocedor di arte na Europa a tuma nota di su obranan y a logra drenta den contacto cune.  Di e forma ey a nace un comunicacion nobo unda a demostra e interes grandi pa e artista di Aruba cuminza participa den expo cu tin na Europa tambe.

   Yahaira a viaha pa Francia unda el a participa den e feria ‘Art3F Paris International Contemporary Art Fair’.  Esaki tabata den Paris Expo Porte de Versailles.

   Segun Yahaira a indica na DIARIO, tabata un satisfaccion y felicidad pa mira su pinturanan ‘Perla di Caribe’ y tambe ‘Joie de Vivre 297’ poni mey-mey di asina hopi obranan bunita di arte di artistanan for di rond mundo.

   Pa Yahaira Croes-Maduro, esaki sin duda ta habri caminda internacional pa su obranan di arte, y sigur ta entusiasma cu su obranan ta hayando admiracion te na Europa.  E ta gradici e.o. Van Gogh Art Gallery di a represent’e na Europa.  E ta gradici tambe su amigonan Ryon Dijkhoff y Brio Croes cu a yude.

   DIARIO a haya sa cu pa December, Yahaira lo bay tin su siguiente solo Exhibicion di Arte di mas obra nobo di dje, y sigur amantenan di obranan di arte abstracto lo keda encanta pa mira e ingeniosidad y creatividad di Yahaira riba su obranan, unda e ta demostra un excelente dominio riba control di color.