Archivonan Meteorologico di Aruba awor a keda completamente digitalisa

ORANJESTAD (AAN): E asina yama ‘International Panel on Deltas and Coastal Areas’ (IPDC), na nomber di su organizacionnan asociado,

a anuncia cu e actividadnan di rescate di dato y digitalisacion di e archivonan meteorologico historico di Aruba, Curaçao y St. Maarten a wordo completa cu exito.

   Door di preserva datonan historico, consehero di maneho awor tin acceso na informacion critico tocante tendencianan meteorologico a largo plazo, cu ta contribui na proyeccionnan climatico mas preciso pa e islanan. E logro aki ta resultado di un colaboracion unico entre e servicionan meteorologico nacional di Aruba, Curaçao, St. Maarten y Hulanda.

   Dunando acceso na dato climatico critico: Tur registro historico a wordo converti na imagennan digital y, den gran parti, e dato a wordo extrae den formatonan lesa pa computer. Door di procesonan di imagen, digitalisacion y wardamento di forma sigura, e proyecto a preserva e registronan aki y haci nan accesibel pa analisis.

   Archivonan meteorologico ta contene informacion di balor incalculabel tocante patronnan historico di tempo specifico pa geografia local. Sin embargo, hopi di e informacion aki tradicionalmente tabata warda den documentonan di papel, loke a haci dificil pa accede y uza den hermentnan moderno di analisis. Ademas, e archivonan aki ta vulnerabel na riesgonan manera candela y eventonan di tempo extremo.

    Un cooperacion fuerte den Reino: IPDC a traha di cerca cu diferente stakeholder den Caribe Hulandes y Hulanda pa implementa e proyecto. Entre e partnernan ta gobierno di Aruba, Curaçao y Sint Maarten; Departamento Meteorologico Aruba (DMA); Meteorological Department Curaçao (MDC); Meteorological Department Sint Maarten (MDS); y Koninklijk Nederlands Meteorologisch Instituut (KNMI).

   Plataformanan local di clima, incluyendo Aruba National Climate Resilience Council (NCRC), a sostene e inicio di e proyecto. Pa facilita coordinacion, IPDC a nombra un gerente di proyecto independiente. E iniciativa aki ta marca e prome colaboracion cu ta reuni  tur servicio meteorologico nacional den Reino Hulandes.

   Miho comprension y proyeccionnan mas robusto: E datonan digitalisa lo contribui na un miho comprension di e condicionnan climatico actual y lo fortalece sistemanan di alerta trempan riba e islanan. Tambe lo nan sostene e desaroyo di proyeccionnan climatico mas robusto despues di e programa di IPDC.

   E partnernan tin intencion di uza e base di dato expandi pa fortalece e scenarionan climatico pa e periodo 2050–2100 den investigacionnan futuro. Eventualmente, esaki lo contribui na un planificacion di adaptacion na cambio climatico mas efectivo pa Aruba, Curaçao y Sint Maarten.

   Digitalisacion di archivo di Antiyas Hulandes: Ademas di digitalisa e datonan cu tabata warda localmente, Gobierno di Curaçao y Meteorological Department Curaçao a pone disponibel e archivo meteorologico di e anterior Antias Hulandes, ubica na Curaçao.

   Despues di un revision legal y di establecimento di acuerdo-nan tocante propiedad intelectual, acceso a wordo concedi na aproximadamente 70.000 pagina di registro meteorologico historico. E registronan aki, cu den algun caso ta data for di 1880, awor a wordo digitalisa y comparti cu Aruba, Sint Maarten y tambe Caribe Hulandes (e islanan BES).

   Pa Aruba y Boneiru, e datonan aki tabata critico pa yena partinan cu tabata falta den nan periodo di referencia climatico normal di 30 aña (1991–2020), permitiendo evaluacionnan mas preciso di tendencianan actual di temperatura compara cu nan base historico.

   Dr. Albert Martis, Director di Meteorological Department Curaçao, a bisa: “Nos ta hopi contento di por duna asistencia nos islanan ruman Aruba, Sint Maarten y e islanan Bonaire, Sint Eustatius y Saba  den fortalece nan proyeccionnan climatico futuro cu ayuda di datonan historico for di e archivo di e anterior Antias Hulandes. Esaki ta precisamente e motibo pa cual nos a conserva y cuida e archivo aki desde 10-10-10, den anticipacion di e dia cu awor a yega.”

   Gobierno di Aruba, Gobierno di Sint Maarten, Departamento Meteorologico Aruba (DMA), Meteorological Department Sint Maarten (MDS) y KNMI a expresa nan sincero agradecimento na Gobierno di Curaçao, Meteorological Department Curaçao y IPDC pa nan cooperacion debolbiendo e datonan historico na e islanan.