Apesar di pandemia a keda cla cu e prome fase di proyecto Kiviti di FCCA

ORANJESTAD (AAN): Prome Minister Evelyn Wever Croes Diamars atardi simbolicamente a entrega yabi di un cas den Palesiaweg na un señora cu ta bay biba den un di e casnan di e proyecto Kiviti di FCCA, cu ta consisti di 71 cas.

Prome cu entrega di e yabi a tuma lugar, e Prome Mandatario a hiba palabra riba e dia cu e proyecto a wordo entrega oficialmente.

E proyecto di vivienda social na San Nicolas a cuminza 26 di Augustus 2019 y tabata un inversion di 11 miyon florin.

Di e 71 casnan cu a keda cla den e prome fase, 66 tin dos camber y 5 tin 3 camber.

Prome Minister a indica cu ta un honor pe, pa entrega e prome yabi.

“For di tempo cu FCCA a cuminza hopi aña pasa bao mando di Diputado Charro Kelly q.e.p.d, FCCA a bira realizacion di e vision di e gobiernonan di e tempo ey, e tempo despues, e tempo awo y e tempo cu ta bay bin pa percura pa ciudadanonan logra yega na nan propio cas”.

Durante tur e temponan aki FCCA a haci esaki y awe por a yuda un gran cantidad di famia pa por haya un dak riba nan cabez y pa nan tin nan propio hogar, segun Wever Croes.

El a sigui bisa cu durante su añanan di existencia FCCA no a para keto, unda cu nan meta primordial di FCCA semper tabata pa busca un mihor forma pa realiza e proyectonan di cas pa comunidad.

“Hopi biaha den e empeno aki, FCCA a crea barionan completamente nobo den diferente distrito di Aruba”.

Esaki ta e caso tambe den e proyecto di Kiviti, segun e mandatario, kende a indica cu e meta di Gabinete Wever Croes ta pa yuda mas tanto ciudadano posibel pa yega na nan propio cas.

El a bisa cu den e tempo di pandemia esaki no tabata facil, pero e proyecto a wordo realiza danki na e esfuerzo di FCCA, di e contratistanan y tur stakeholder cu a haci esaki posibel.