Apertura di sucursal self-service di Aruba Bank di Caya Grandi

ORANJESTAD (AAN): Aruba Bank a celebra cu gran orguyo e apertura di su sucursal “Self Service” den Caya Grandi,

awor transforma pa brinda servicionan Self-Service den un atmosfera moderno, cu ta ofrece mas comodidad, acceso y inovacion pa comunidad.

   E aña aki Aruba Bank ta celebra 100 aña di existencia, un siglo di confianza, servicio y crecemento hunto cu comunidad di Aruba. Durante tur e añanan, Aruba Bank a keda fiel na su compromiso pa sigui inverti den e futuro di Aruba y den bienestar di su clientenan.

   E sucursal den Caya Grandi tin un gran balor historico, como un parti esencial di e desaroyo economico y comercial di nos capital. Cu e apertura aki, Aruba Bank ta reafirma su confianza den e vitalidad di nos centro.

   Caya Grandi semper a simbolisa movimiento, comercio y bida. Mantene e banco su presencia ta un forma concreto di contribui na e revitalisacion di Oranjestad.

   Den un mundo caminda comercio y tecnologia ta sigui evoluciona, Aruba Bank ta demostra cu inovacion ta bay man den man cu acceso, comunidad y confianza.

   Parti pafo di e branch den Caya Grandi tin un ATM-Mashin, un Smart Deposit Mashin, y un Night Depository, disponibel te 10’or di anochi.

   Paden di e Self Service Branch tin un ATM-Mashin, tambe 1 Smart Deposit Machine pa deposito rapido y conveniente pa cliente y comerciante.  Tambe tin dos Self-Service Kiosks pa servicio inmediato manera cambia adres, transferi fondo, of check balans.  Tambe 2 computer pa acceso digital.  Pa asisti clientenan, dos ‘Digital Ambassadors’ lo ta presente pa guia tur cliente cu ta desea asistencia y servicio.

   Aruba Bank ta mas cu un banco, nan ta un partner di confianza den e progreso di nos pais. E sucursal aki ta un demostracion di nos compromiso pa sigui innova, ta mas cerca di nan cliente, y ta un parti activo den e desaroyo di Caya Grandi.

   Aruba Bank ta gradici tur esnan cu a contribui pa logra e proyecto aki, nan team interno te na e contratistanan, y naturalmente nan clientenan cu ta e razon principal pa nan existencia. E Self-Service Branch den Caya Grandi ta un simbolo di progreso, inovacion y servicio, reafirmando e mision di Aruba Bank: Sigui crece hunto cu Aruba.