James Sneek, director di Fundacion Telefon pa Hubentud (131), a declara cu ta un hecho cu nos hobennan no ta asina expresivo mas.
Sneek a señala cu awo por mira cu nos mucha y hobennan ta acumula tur cos paden, y no ta expresa esaki. “Nos tur ta hende y nos sa cu na dado momento un explosion por tuma lugar.
Importante ta pa nos analiza pakico e mucha y hobennan aki ta menos expresivo. Hopi biaha bo ta mira cu tin falta di confianza cu ta na cas mes, den cura di scol, den un club deportivo, por ehemplo, y door di desconfianza no ta facil pa nan expresa nan mes.
Banda di esey nos tin cu wak cu nos mucha y hobennan ta hopi online. Tur cos cu nan ta mira ta tuma lugar afo, tur cos cu nan ta mira ta sosode na Amsterdam, na China, na New York, segun nan, nan ta mira cu ‘mi ta mescos cu e hoben aki’. Esey ta un desaroyo cu ta tumando lugar, y importante ta con nos ta bay trece un ‘draai’ den esaki. Mi ta kere cu ta hopi importante pa no solamente mayornan pasobra nos ta un comunidad hopi chikito, nos ta un Isla chikito y e ta un responsabilidad comparti. Nos tur hunto, tin cu duna sosten den e caso aki na e mayornan, cu ban bisa mester ta pafo di cas p’asina por labora y cria su famia tambe. Anto, kico nos kiermen cu esey? Esey kiermen cu nos tin duna e hoben, e mucha, e siguranza cu nos tey pa bo, nos tey pa scucha bo. No cu mi mester tin un opinion directamente, pero cu mi ta scuch’e y crea un confianza”, James Sneek, director di 131 a expresa.
E trabao cu 131 ta haci, por ehemplo, na scolnan loke nan ta trata di haci ta crea un relacion cu e mucha y cu e hoben. Na momento cu bo crea e relacion aki, e momento ey bo por crea confianza, y na e momento di crea confianza e hoben por expresa su mes y bisa cual ta e problema of reto cu e ta sinta cu ne y puntra kico e por haci.
