Apertura di Expo di fotografia di studiantenan di e Facultad di 'Social Work and Development' di Universidad di Aruba

ORANJESTAD (AAN): Dialuna 26 di mei, studiantenan di Universidad di Aruba, di e Facultad di Social Work,

a presenta un Exposicion di Fotografia na Biblioteca Nacional na Oranjestad. Minister di Salud Publico, Asunto Social, Cuido di Adulto Mayor y Cuido di Adicto, drs. Mervin Wyatt-Ras, a corta cinta y habri e exposicion oficialmente.  

            Como parti di nan estudio, studiantenan di e Facultad di Social Work and Development di Universidad di Aruba a drenta den nan propio comunidad pa identifica problemanan social y pensa riba solucionnan potencial. E proyecto aki ta parti di e curiculo di e studiante di Social Work and Development (Bachelor di prome aña).

            Trahando di manera individual, e studiantenan a uza nan "wowo sociologico" y corahe pa captura un problemanan social na Aruba. Pa medio di fotografia, cada studiante a scoge un potret di un situacion cu ta representa un problema social y a saca un otro potret cu ta representa e posibel solucion pa e problema. Pa amplia e comprension, cada studiante a scoge un teoria sociologico pa splica e causa di e problema y un otro teoria pa splica e posibel solucion.

            Minister di Asuntonan di Reino, Ensañansa, Hubentud, Innovacion y Deporte, mr. Gerlien Croes a keda impresiona cu e manera unico cu e studiantenan di Social Work a presenta e realidad den cual nos ta biba awendia. E retonan social cu nos ta wak den cada comunidad y con esey ta coresponde cu e posibel solucionnan cu nos por trece pa esaki. Ta hopi importante pa realisa cu desaroyo economico a percura pa un desbalance enorme rond mundo y na Aruba y mester crea e balansa aki bek cu ta inclui aspectonan social y emocional.

            E tipo di actividadnan asina ta duna un bista profundo di e problemanan social cu ta biba hopi biaha den silencio cerca nos comunidad. Ta lanta, traha y dia ta pasa bay laga nos sin cu nos ta para keto y wak si e desaroyo ta yega cerca tur hogar. E desaroyo mester ta parti di e causa comun y e responsabilidad di e organisacionnan multi nacional mester inclui inversionnan cu ta haci den comunidad.

            Segun Minister Wyatt-Ras “e studiantenan aki, pa medio di e proyecto aki por a trece solucionnan pa cierto problematicanan cu nan a trece pa dilanti”. “Tin hopi problema social, pero mester pone cabesnan hunto pa trece solucion y empodera nos hendenan y tuma accion concreto pa disminui e problemanan social den nos comunidad”. No tin solucion magico pa problemanan social mirando cu ta problemanan compleho, pero na momento cu tin un bista real di e problemanan aki, y instancianan traha hunto, por yega na solucionnan efectivo y duradero.

            E Exposicion Fotografico na Biblioteca Nacional na Oranjestad ta habri pa publico te cu 18 di juni 2025 durante orario regular.