Anouk Eman a dispidi cu tur honor di e corona di Miss Universe Aruba 2024

Pa: Addonsito Croes

Den Cas di Cultura dilanti un publico grandi, Miss Universe Aruba 2024, Anouk Eman a tuma despidida di su corona.

Un aña largo e tabatin e honor di carga e corona aki, cu den su palabranan el a carga cu tur honor cu por tin. Tabata un placer y honor di representa Aruba, su isla cu tanto e ta stima, na Mexico den 2024. Den 130 pais rond mundo el a haci su maximo esfuerzo pa pone Aruba su nomber resona dignamente riba e mapa universal.

Den tur e paisnan participando na Miss Universe, el a sa di clasifica den e top 30 y tambe a bay cu e di dos lugar di e Voice of Change challenge 2024.

Pa e final di su reinado, Anouk a bisti su shimis ‘scoliosis/ Iron woman’ cu el a uza na Miss Universe.  El a gradici Roberto Avalo pa semper a pone luci spectacular biahando cu ne aña pasa pa Mexicio. Na final di su speech, Anouk a gradici organisacion di Miss Universe Aruba y cada persona cu a yud’e logra tur loke el a logra y a desea su sucesor tur exito di mundo den su representacion di Aruba.  E mester sa cu e ta un aña den cua e tin cu disfruta cada momento di e reinado. Anouk tabatin e honor di bisti Miss Universe Aruba 2025, Hannah Arends su sherp nobo. Na nomber di cada persona cu ta biba na Aruba of cu ta sinti e cariño pa nos isla, nos ta gradici Anouk masha hopi pa tur loke el a haci pa nos.

Potretnan:  Rex Aruba y Anouk Eman