Minister Wendrick Cicilia, Titular di Labor:
ORANJESTAD (AAN) -- Minister Wendrick Cicilia, den su calidad di titular di Labor, el a bisa cu e tin un bon comunicacion cu e Departamento di Labor, y tambe un bon cooperacion di trabao y un contacto hopi stricto, pero tambe e ta scucha ciudadanonan tocante e servicio cu Departamento di Labor ta brinda. Den e rosea aki, a habri un vacante pa un hurista cu experiencia amplio y hopi conocemento den “Arbeidsgeschillen”.
E dignatario ta splica: “Locual ta importante tambe ta cu nos ta scucha diariamente di e comunidad, y di empleadonan cu ta sinti cu e servicio cu ta wordo brinda no ta asina optimal, no ta na nan satisfaccion. Y e ta nos tarea, pa conhuntamente cu e departamento, eleva e servicio pa satisface esnan cu ta den busca di un derecho. Den e cuadro aki, nos a bin cu diferente pensamento cu ta den ehecucion”, e dignatario a duna di conoce.
Minister Cicilia a sigui splica cu un di e pensamentonan aki ta, cu na momento cu un persona ta bay entrega keho laboral na Departamento di Labor, aworaki a duna autorizacion na e director interino, na e momentonan aki, pa por adkiri un hurista di amplio experiencia den Arbeidsgeschillen.
E minister a splica cu Arbeidsgeschillen ta e departamento cu ta atende cu disputanan laboral, na momento cu bo entrega un keho, y aworaki a habri un vacante pa adkiri un hurista cu amplio experiencia, y esaki ta den proceso, p’asina por brinda no solamente satisfactorio, pero tambe di calidad, di manera cu por evalua diferente keho a base di normanan huridico y por duna tambe conseho hopi mas argumenta, balansa y obhetivo, y cu tin hopi mas peso tambe, na momento cu tin disputa entre empleado y doño di trabao.
