Anouk Balentina a entrega denuncia cerca Ministerio Publico contra maneho di incinerator y Dump

ORANJESTAD (AAN): Diaranzon Atardi Anouk Balentina a bay entrega un denuncia oficial cerca Ministerio Publico (OM), relaciona cu maneho rond di e Incinerator y Dump di Parkietenbos.

E habitante di Parkietenbos a splica cu el a lanta y gana un caso civil caba contra e situacion cu tin rond di e incinerator na Parkietenbos.

“Awe mi a haci dos denuncia, di cual e prome ta trata instalacion di e incinerator cu ta basa specificamente riba articulo 1, 2 y 16 di e ley di molester (‘hinderverordening’)”.

Ta asina cu e ley ta bisa cu bo no tin mag di bin cu un instalacion asina sin un hindervergunning y na 2019 ya caba a bin cu e instalacion sin un hindervergunning, segun Balentina.

El a splica cu despues di esey a duna instruccion pa start, test y opera e incinerator, tambe sin hindervergunning.

“Motibo cu mi ta para akinan awor ta cu e tempo ey mi no a haya oido”.

Tur autoridad cu mi a acerca a ignorami, entre otro polis, DVG y te hasta e fiscal e tempo ey, como tambe e director di DWJZ.

Door di esey mi a lanta un caso civil y mi a haya mi razon, segun Balentina.

El a bisa cu Land Aruba tambe a admiti cu nan a haci algo contra ley y cu huez tambe a pone esey den e veredicto.

Balentina a uza esey como prueba pa entrega e denuncia na OM.

El a sigui bisa cu e minister cu e tempo ey a duna opdracht pa bin cu e incinerator a actua contra e ley di molester.

Segun Balentina, e minister despues cu a duna instruccion pa opera e incinerator tambe a actua contra ley.

“Loke mi kier pone bon cla ta cu leynan tey pa un motibo”.

Den cada ley tin un derecho y den e caso aki ta e derecho di e ciudadano pa wordo proteha di e molester.

Si nos como ciudadano pasa den un luz cora, di biaha polis ta nos tras y nos ta haya un multa.

Dicon ora cu un minister trapa riba nos ley y derechonan, nada ta pasa?, Balentina a puntra.

El a splica cu segun key esaki ta castigable y tin multanan cu por wordo duna, como tambe castigo di prison.

Segun Balentina, e veredicto di huez ta bisa cu mester haci cierto cambio na e incinerator, pero cu esakinan no a wordo haci corectamente.

E otro denuncia cu Balentina a entrega ta contra e dump mes, pasobra pa esey tambe bo mester tin un hindervergunning, of e mester wordo regla via un asina yama Landsbesluithoudende Algemene Maatregel van Bestuur.

Sinembargo, den e caso aki tur cos a wordo regla via un Decreto Ministerial.

Esaki pa evita di bay Parlamento, segun e ciudadano preocupa.