Frederick Nuboer di ARA: - ORANJESTAD (AAN): Frederick Nuboer, Presidente suplente di Algemene Rekenkamer, Diaranson mainta a asisti na e ronda consultativo cu Gobernador Alfonso Boekhoudt.
Den un declaracion na prensa el a expresa cu Rekenkamer a tuma nota di e resultado di eleccion 2021. "Toch un cambio manera nos tur por a wak grandi den e manera cu e asientonan a wordo comparti". El a agrega cu den cuadro di esey nan a bishita gobernador.
Pa loke ta e proximo añanan di gobernacion, el a bisa cu ta den un trayecto cu a wordo inicia caba bao di e gobierno anterior. Afspraaknan traha cu Hulanda y e afspraaknan ey lo mester wordo cumpli tambe.
Tin un proceso andando caba, specialmente e cuenta anual di Pais Aruba. El a remarca cu lamentablemente mester a constata cu tin un retraso di 2019 y 2020. Rekenkamer mester a haya 1 di Juni 2021, e cuentanan anual di 2020 y nan no a ricibi esaki, a indica.
E proceso a stanca y nan ta tumando nota cu cierto decision a wordo tuma pa e cuminsa bek. Pero e trabao di controla e cuentanan anual no por sosode, a bisa.
"Esaki ta un proceso cu un pais madura. 35 aña cu Status Aparte, no por tin. E ta pone nos bao di nivel. Mirando e afspraaknan traha cu Hulanda ya caba e ora por constata cu bo no ta wantando bo mes na afspraaknan", Nuboer a enfatisa.
El a sigui bisa cu mester por yega na cuentanan anual cu tin un 'verklaring' cu ta acorda door di un contador externo. Rekenkamer di su banda kier haci tur cos pa por yega na un tipo di 'verklaring' asina, pero mester constata cu no ta eynan ainda.
Frederick Nuboer a agrega cu e cuatro añanan dilanti lo mester traha duro, hunto, pa por yega na cuentanan anual 'goedgekeurd'. Esey kiermen cu leynan mester wordo cambia, hendenan lo mester wordo getrain y poni na diferente departamento unda eynan caba e control ta cuminsa.
