Anouk a ricibi un berdadero recepcion caluroso na su yegada

Un di e 30 muhernan mas impactante di Universo

ORANJESTAD (AAN): Diamars merdia un cantidad di miembro di famia, amigonan, diferente reina local di beyeza, y tanto Klas 1A y Klas 1B di Mon Plaisir Basis School tabata presente na Aeropuerto, na momento cu Miss Universe Aruba, Anouk Eman a regresa for di Mexico, unda el a duna un sublime presentacion na e certamen.

   E beyeza Arubiano cu a logra sali den Top 30 di e muhernan di Universo e aña aki, na su yegada na Gate a wordo ricibi door di Ministro Xiomara Maduro di Ministerio di Cultura, como tambe Prome Ministro Evelyn Wever Croes.

   Multitud para pafo: Ora di sali pafo di Sala di Yegada, aki a bin topa cu un multitud di hende para ta wardando su yegada, cu diferente borchi di e.o. ‘Iron Woman’, y borchi cu ta felicita Anouk y bise cu ‘Aruba ta orguyoso di bo”.  Tabatin monton bandera di Aruba, y gritonan di alegria ta resona.  Anouk mesora a core duna tur hende un abrazo, y a haya chens di saca potret tambe.

   Mas alegria ora el a sali pafo di e edificio, y a bin haya cantidad di alumno di Mon Plaisir School ta canta un cancion special traha pe.  Anouk a mira su sobrino stima entre e alumnonan y mesora a bay braz’e fuertemente.  E muchanan tabata rek pa asina haya sea un man of abrazo di e candidata di beyeza, y por a mira diferente turista cu a caba di yega como pasahero tambe ta sacando potret.

   Hopi impresiona: Anouk a ricibi un berdadero bon bini caluroso, demostrando asina cu Aruba ta duna balor na su prestacion, perseverancia, y logro durante e certamen aki.  Y por a mira riba su cara, cu el a keda hopi impresiona y contento cu e recepcion.

   DIARIO a menciona cu ademas di sali den Top 30, Anouk ta un di siete candidatanan cu a wordo anuncia como ‘Silver Winners’ den e competencia di ‘The Voice for Change’.

   E competencia di ‘The Voice for Change’ ta un iniciativa global cu a encurasha candidatanan di Miss Universe pa crea video encuanto causanan social cu ta preocupa nan.  Miss Universe Aruba, Anouk Eman den su video di 2024 The Voice for Change, a comparti su pasion pa mehora e educacion di calidad cu inclusion y boga pa e muchanan neurodivergente di mundo.