Anochi Literario na Biblioteca Nacional Aruba cu homenahe na Frida Winklaar-Domacassé

Diaranson awor

ORANJESTAD (AAN): Diaranson, 29 di mei 2024, di 6.30 pa 9.00 di anochi lo tin otro Encuentro Literario-Cultural na Biblioteca Nacional Aruba na George Madurostraat, Oranjestad.

   Ta un anochi hopi special cu un programa excepcional presenta pa Biblioteca Nacional Aruba, Departamento di Cultura Aruba hunto cu Gestor Cultural Mirto Laclé. Lo presenta un programa pa celebra nos multiculturalidad y multilingualidad.

   Durante e programa lo tin enfoke riba e diferente disciplinanan, entre otro Literatura, Arte, Cultura, Linguistica y Educacion en general. Lo tin presentacion di charla, musica, canto, baile, declamacion y exposicion.

   Como huesped for di Hulanda lo ta presente e autor y poeta Frida Winklaar-Domacassé, tambe Steve Francees, artista pintor di Aruba, lo duna un presentacion. Tambe lo tin agasaho musical di e banda Ash & Friends.

   Grupo di baile Club di Movemento lo ta presente pa deleita cu algun baile.

E autor-poeta, Frida Winklaar-Domacassé, lo ricibi un homenahe pa su obra literario. Frida ta miembro di e organizacion artistico Simia Literario na Hulanda.

Lo tin atencion special pa Adinkra, e ultimo obra literario di Frida Winklaar.

   Ta trata di un edicion special den cuadro di Conmemoracion di Pasado y Herencia di Sclavitud 2023. Recientemente a presenta e buki Adrinkra na Hulanda. Awor Aruba tin e honor pa presenta e ultimo obra di Frida Winklaar-Domacassé.

   Adinkra ta simbolonan cu nan raisnan na Ghana y Costa Marfil. Nan tin nan propio nificacion y mescos cu proverbio ta expresa sabiduria di bida.

Steve Francees lo duna un presentacion di algun di su pinturanan dedica na Aruba y Bonaire, pero tambe na pintura/cuadro relaciona cu e tema di Conmemoracion 160 aña di Sclavitud.

   Grupo di baile Club di Movemento lo demostra algun baile. Scol di baile Club di Movemento ta bou di guia di Samantha Westera-Juppa den cooperacion cu Vivian Maduro-Crespo.

   Tambe lo tin actuacion di diferente artista cu lo duna nan presentacion den canto y declamacion, manera Karina Maduro, Ariana Koolman- Chirino, Aurelia Croes y John-Freddy Montoya.

E banda musical Ash & Friends, consistiendo di e musiconan Ash, Shurby, Vio y Chicho lo ta presente y lo deleita publico cu musica bailabel Latino-Caribense.

Publico en general ta bon bini. Autor y poetanan bini pa apoya y celebra bida. Entrada pa e evento ta gratis.