ORANJESTAD (AAN): Recientemente Departamento di Agricultura, Cria y Pesca a informa instancianan di a haya un Annona squamosa, Scopapel ta crece den naturalesa di Aruba.
Scopapel ta famia di Annonaceae mescos cu Sorsaca. Arnoldo’s Zakflora di 2012 ta haci mencion caba di e crecimento natural di Scopapel na Curaçao cu pregunta si no ta e caso na Aruba y Boneiro.
Esaki lo mester a señala instancianan cu probablemente e lo establece su mes tambe na Aruba y Boneiro. Den ciencia di invasion di mata ta conoci cu si un especie ta invadi na un lugar cu ta masha probabel cu den ambientenan comparabel, manera Aruba ta compara cu Curaçao, e lo haci mescos.
Di mes pasobra DLVV tambe tabata bende e cu hende pa nan cultiv’e den nan hardin. Por medio di hardin hopi especie a adapta na e condicionnan di crecimento local.
Ora e especienan ta mara na areanan di cultivo botanistanan ta papia di un especie exotico. Ainda si toch el a scapa pero no ta multiplica su mes.
Awor cu esun aki cu DLVV a haya su estado a pasa di exotico, cu no tabata parti di e vegetacion local, pa e estado di estableci. Akiden mas ainda e especie ta adapta na e circumstancianan local y por pasa añanan asina.
Den e fase aki ainda instancianan por eradic’e completo pasobra DLVV no ta na altura cu kisas otro instancianan a yega di constata caba cu e ta crece natural na Aruba. E ehemplar cu DLVV a meldo ta crece pega cu Eagle Beach. E lugar obviamente hende a yega di manipula, esta a coba ambos banda di e caminda geulnan den e Klip pa probablemente percura pa e desagu’e di e localidad.
Un lugar cu antes hende a kita e vegetacion original anto door di tempo y podise falta di mantencion, naturalesa a recolinisa botanistanan sa yama naturalesa secundario pa bisa cu e ta diferente cu un cu hende no a manipula. Probablemente debi cu a cob’e e ta mas abou cu e superficie su rond y tin mas humedad.
Asina e Scopapel a recien nace abou di un Kwihi grandi cu a crece ey y mehora e circumstancianan local mescos e Hubadanan na banda ta haci. Ademas di e Scopapel DLVV a tuma nota tambe di Washingtonia robusta cu ta crece natural eynan.
Un otro invasor cu ya ta presente caba den Bubali Plas. E hecho cu no tin un instancia cu ta interveni pa kita nan di establece nan mes ta pasobra no tin maneho oficial pa anda cu especienan invasivo.
Es mas, e Natuurbeschermingsverordening ta solamente recomenda e maniobranan cu por stimula especienan local pa crece. Asina tambe lo por stroba especienan exotico di establece nan mes con tal cu no tin otro intervencionnan di e hende cu ta stroba manera urbanisacion.
Esun maniobranan represivo manera kita Scopapelnan indesea no ta menciona niun caminda. Instancianan concerni ta na altura di e situacion aki.
