Andre Henderson cu un exposicion sumamente impresionante riba herencia di sclavitud

Parlamentario Evelyn Wever-Croes a keda impresiona

ORANJESTAD (AAN) Recientemente Parlamentario Evelyn Wever-Croes tabata na Fort Zoutman pa atende un exposicion sumamente interesante di e pintor Andre Henderson c uta un pintor Mericano cu a bin Aruba pa comparti su obranan riba e tema di herencia di sclavitud.

   Parlamentario Wever-Croes a expresa cu e exposicion aki tabata hopi impresionante mirando cu e calidad y finesa di e arte y su forma di pinta ta unico. Loke a resalta aun mas ta e mensahe cu e kier a trece dilanti cu su arte. Cada obra ta papia riba nan mes y tin nan mesun storia. Señor Henderson a concentra su mes hopi riba sclavitud transatlantico, riba e transporte di esclavonan di Africa pa e continente Mericano y e impacto cu esaki tabata tin na Africa y den e continente Mericano.

  Pa tur esnan cu lo desea di siña mas riba nos herencia di sclavitud y mira kico tur a pasa den nos historia,

of simplemente kier mira un exposicion di calidad hopi halto aki na Aruba na Fort Zoutman por pasa admira esaki tur dia den siman di 9 am pa 5 pm. Durante e evento cultural “Bon Bini Festival” tambe e lo ta habri  y riba diasabra tambe (orario ta varia).

   “Manera semper mi ta bisa bo mester conoce bo historia, pa bo comprende e presente pa bo por ta exitoso den futuro. Mi ta gradici Andre Henderson pa a confía Aruba cu su obranan y tur esnan cu a haci esaki posibel. Mi ta recomenda tur hende pa pasa wak e exposicion aki.” Parlamentario Wever-Croes a expresa.