Analisando e problemanan mundial severo bao superficie

Observador local Simon Waslander cu analisis macro-economico

* Un 'storm' grandi economico ta na caminda 

ORANJESTAD (AAN): E analista local Simon Waslander, a caba di haci un analisis macro-economico fresco, uzando e data di mas 'up-to-date', riba e topico interesante aki.

   Segun Waslander, mayoria hende ta sinti cu algo ta “off” cu e economia global y indirectamente esun di Aruba. Na e momento aki e no ta obvio ainda pa ainda cu economia global mes ta den problemanan sumamente grandi y bastante severo. Pero si bay mira mas cerca “bao di e hood”, manera nan ta bisa, bo ta mira cu tin varios evento pasando cu ta indicando cu mester ta hopi cauteloso.

   E Ilusion: Mercado di Accion di Merca: Awor prome bay wak bao di e hood pa analisa e motor mes. Un persona lo por bisa inmediatamente cu e mercado di accion di Estados Unidos ta na un nivel record. Con por ta e ora cu supuestamente tin problemanan severo anto?

   Esaki ta debi na e 7 accionnan grandi di tecnologia cu ta entre otro Microsoft, Apple y Amazon.
Si nos exclui e companianan aki e imagen mas general di mercado di accion ta hopi mas scur mane nos por wak den e grafico di banco Goldman Sachs.

   E problema fundamental: $224 TRIYON na debe: E problema fundamental mes pa full mundo ta cu tin demasiado debe den e systema global. Usando analysis di Bank of America Merril Lynch, tin mas cu $224 Triyon US Dollars na debe mundialmente.

   Cu interes na Estados Unidos band’i 5%, esaki simplemente no ta un situacion cu por caba bon den ningun manera.  Ya caba por cuminsa mira kraaknan grandi aparece na nivel international.

   Advertencianan grandi: China y Banconan di Merca: Cu tanto debe y e interes halto, accidentenan lo pasa. Na unda precies y den ki tempo exacto casi niun hende lo por predici. Pero nos a cuminsa wak “waarschuwingen” bastante fuerte caba.
   E prome ehempel ta e economia di dos mas grandi na mundo, locual ta China. Den e lunanan cu a pasa nos wak e mercado di accion local di e pais den “freefall”.  Siman a start y hasta a anuncia medidanan den direccion di “Capital Controls”. Letterlijk e mesun dia aki cu e medidanan aki a worde publica officialmente, nos a wak e mercado di accion crash 8%.

   Awo China ta un pais “leu” cu Aruba no tin hopi exposure directo na dje. Pero bao e hood, nos a cuminsa wak cosnan espantoso pasa tambe na Estados Unidos. Siman pasa nos a wak e accion di New York Community Bank cay 37% den letterlijk 1 dia.

   Esaki ta e prome “slofnan” cu a cuminsa cay bao e presion di interes halto, pero e systema bancario mes na Merca ta sintando riba un timebomb di mas di $675 biyon dollar den perdida debe na e interes na e momento aki.

   Waslander a finalisa indicando cu e meta di e articulo aki ta pa adverti pueblo y nos clase elite politico y gobernantenan cu un storm grandi economico ta na caminda y pa prepara prome cu esaki yega den forza completo.