Manera DIARIO a anuncia Hulanda confronta cu crisis politico serio
*Omzigt ta ripiti su formula politico instabil cu a duna Wilders victoria
*Formacion Gobierno Hulandes nobo ta menasa partidonan nobo
ORANJESTAD (AAN) — For di prome cu eleccion Hulandes a tuma lugar na 2023, DIARIO continuamente a informa su lectornan cu e situacion politico na Hulanda, tabata marca pa e resultadonan di un Pueblo sumamente malcontento cu e ultimo gobernacionnan di Mark Rutte.
Dos partido politico a trata di convence Pueblo di Hulanda durante e ultimo eleccionnan cu nan tabata e solucion pa votadornan Hulandes, cu kier biba na un Hulanda cu gobernacion a haci asina costoso, cu pobresa y problemanan social, ta afecta e pais cu hasta mester importa trahador pasobra e no tin suficiente man pa traha.
E sistema socialista cu a domina como base di paketanan politico, cu a haci Pueblo dependiente di sistemanan gubernamental a uno di e paisnan mas rico na mundo, cu ta Hulanda, a fracasa debi na e peso cu el a bira pa e comunidad Hulandes.
Na caminda pa eleccion 2023, Hulanda a conoce partidonan nobo manera tabata e caso cu BoerBurgerBeweging, cu a causa bastante impacto na prome momento pero a baha den popularidad, na momento cu Pieter Omtzigt a bandona filanan di partido CDA, pa presenta su mes como e alternativa pa e Pueblo Hulandes.
Poco atencion a wordo dedica na e nacionalismo nobo cu ta realmente e contenido di e programa di Geert Wilders, cu como dirigente politico, a ofrece e Hulandesnan e pakete tan espera, cu ta basa riba uzo di placa di Hulanda pa e bienestar Hulandes y directamente di e Hulandes.
E resultadonan di eleccion no a laga ningun lugar na duda. Tabata Ronald Plasterk, conoci na Aruba como e gobernante Hulandes cu a pone fin na e huelga di hamber di Mike Eman, cu despues di eleccion a ricibi e encargo pa trata na forma un Gobierno Hulandes nobo a base di e resultadonan electoral.
DIARIO a papia for di inicio di e problemanan sumamente serio cu tabata spera e formacion di e Gobierno cu lo tabata tin Wilders como Prome Ministro di Hulanda y tambe di Reino Hulandes.
Tabata conoci for di e prome momento cui sigur e partidonan di Mark Rutte, cu a entrega su posicion di dirigente di VVD na su sucesor, como Pieter Omtzigt, lo tabata tin problema pa forma un Gobierno cu Geert Wilders, e revolucionario Hulandes cu aspiracion pa entrega e Hulandesnan un Hulanda renoba cu tur resultado cu esaki a encera.
Pieter Omtzigt for di principio cu el a bandona CDA, manera DIARIO e tempo a mustra, tabata baila un paso doble politico den cual e no kier a mara su mes obviamente na splicacion concreto di loke por a spera di su partido den gobernacion.
E forma cu el a crea suspenso enorme si e ta bay participa na eleccion si of no, a afecta hasta su resultadonan durantenan eleccion ya cu e no por a duna e siguransa cu e pueblo Hulandes tabata exigi.
Formacion di un Gobierno dirigi pa Wilders segun deseo di Pueblo Hulandes, a cuminsa pero DIARIO a spierta pa bomnan cu por a rementa cualkier momento y sigur durante ultumo siman, cu Pieter Omtzigt a bolbe presenta su mes como bailador di tango politico den e escenario cu tabata conduci na e realisacion di Gabinete Wilders.
Ayera Omtzigt mester tabata tin un reunion cu Wilders, pero na forma di sorpresa el a anuncia cu e no por sostene un partido encabeza pa Wilders.
Esaki a nifica un crisis directo pa formacion di un Gobierno nobo na Hulanda cu a keda den un suspenso total mientras solucionnan tabata wordo busca.
E reaccionnan, manera DIARIO a anuncia for di e edicion di ayera, tabata indica cu den un posibel fayo di e formacion di un Gobierno Wilders, Pueblo Hulandes por duna mas sosten na Wilders pa asina garantisa cu e ta forma y ta dirigi e proximo Gobierno Hulandes.
Informantenan di DIARIO cu a duna prueba di ta digno di credito na Aruba, cu DIARIO ta informa debidamente, na momento di ciere di e edicion di awe a indica cu aparentemente ya Omtzigt lo a trata na bolter e sucesonan di ayera y e forma cu el a bari e formacion cu tabata andando for di mesa.
Si prome cu el a presenta cu su partido pa participa na eleccion el a percura pa suspenso, ayera nochi tabata tin indicacion grandi den mundo politico Hulandes, cu el a ripiti su maniobra y a expresa su mes dispuesto pa yuda forma un Gobierno nobo pa Hulanda.
Te na ciere di e edicion di awe, no tabata tin e confirmacion cu e negociacionnan pa un Gobierno Hulandes nobo, lo por a sigui na man di Plasterk, cu tabata prepara su mes pa presenta informacion concreto riba e desaroyonan, cu na prome momento e mes no por a comprende.
DIARIO ta sigui traha riba tur informacion cu ta confirma e fluho di informacion corecto cu DIARIO a presenta na Aruba, na caminda cu politiconan Hulandes kier a kibra reglanan vigente pa RAFT, pa pone Aruba inhustamente bou supervision a base di e prestamo pa Covid-19.
E formacion di un Gobierno nobo pa Reino Hulandes tambe, a drenta un fase nobo marca pa insiguridad.
