Aña record pa Aruba Airport Authority

A aproba e cuentanan anual di aña 2024

ORANJESTAD (AAN):  Durante un reunion oficial diabierna ultimo na aeropuerto, e unico accionista/doño, e Hunta di Comisarionan, e gerencia y e accountant cu a audita e cifranan di aña 2024 pa Aruba Airport Authority, a repasa e cuentanan anual di aña pasa durante un “Algemene vergadering van aandeelhouders”. Ta considera aña 2024 como e miho aña den henter historia di nos aeropuerto, tanto na nivel di movecion di avionnan, cantidad di pasahero y pa entrada y ganashi di e compania estatal.

            Na final di e reunion, Minister mr. Wendrick Cicilia, den representacion di Gobierno di Aruba siendo e doño di 100% di Aruba Airport Authority, a aproba e cuentanan anual “Focusing Forward”. Na final di e reunion, tres miembro di e cuaternan cu ta forma e Hunta di Comisario, apunta door di e gabinete saliente, a haci uzo di e oportunidad pa tuma nan retiro, pa cual e accionista a acepta esey tambe. E siman aki lo apunta tres miembro nobo den e Hunta di Comisario, cu lo sigui cu e trabou di supervisa gerencia di AUA Airport.

            E mandatario a gradici e Hunta di Comisario saliente y alabes e ekipo di gerencia di AUA Airport. No por kita for di bista, cu na momento cu e CEO apunta pa Royal Schiphol Group a retira, cu ta e ekipo di Rubianonan a carga e compania y a comparti e responsabilidadnan di e funcion di CEO, banda di nan otro funcion. AUA Airport a sa di demostra resiliencia na tur momento y a hasta supera den un gran forma.

            “Aruba por ta orguyoso di nos aeropuerto, gobierno ta kere den un acuerdo di cooperacion estrecho cu Royal Schiphol Group, cu nan experiencia y conocemento banda di esun di nos propio localnan, pa hunto hiba e compania na e siguiente nivel di crecemento. E maneho nobo awo lo ta mas dirigi, den concordancia cu e maneho di Gabinete AVP-Futuro, pa promove mas turismo di calidad”, asina Minister mr. Wendrick Cicilia a duna di conoce na salida di e reunion. E bon trabou cu cada un empleado a desplega ta bisto cu awe nos por a yega na e resultado aki.

            Sin ningun duda por bisa cu Aruba Airport Authority ta un di e companianan estatal, miho maneha y cu miho resultado di ganashi.