Na un isla fragil sin 'back up' di produccion e ta inversion di halto riesgo
*Gastonan pa haci negoshi den e sector tambe ta hopi diversifica
*Turismo ta yena caha di placa di Aruba cu pago di belasting
ORANJESTAD (AAN) — Cu aumento di e posibilidad pa biaha, e sector di turismo despues di Segunda Guera Mundial a bira un ramo importante di industria, sigur pa paisnan sin rikeza natural y produccion di material prima cu otro tipo di industria ta rekeri.
Cruceronan a transporta e hende cu a haya rikeza nobo den e economia mundial nobo, pa destinacionnan manera region di Caribe, cu asina tambe a keda expone na mundo den un tempo cu ta fotonan di turistanan tabata mustra nan gruponan familiar y di amigonan, kico mundo tabata tin pa ofrece pafor di e teritorio caminda nan ta biba.
No mester lubida cu e tempo no tabata tin television pa hiba imagennan di otro parti di mundo na hende. Un portret cu a saca durante vacacion cu camaranan cu tambe a habri un porta nobo pa hende, tabata ilustra kico mundo tabata tin pa ofrece.
Turismo tabata directamente mara na e posibilidad pa gasta placa pero esun cu ta gasta placa tambe kier a ricibi trato di un Rey, a base di e placa cu e tabata gasta y cu asina a habri negoshinan na paisnan desconoci ainda pa mundo.
Den region di Caribe tabata nota un afan grandi por ehempel di turistanan cu tabata cumpra joyas cu piedranan precioso manera diamante, pero tambe articulonan manera manera linnen, perfume di sigur Francia, pa no papia mes di holoshi Suiso cu nan por a mustra na cas.
Turismo di estadia a haci su entrada rapidamente den region di Caribe, cu ta conecta e poder di compra Mericano, cu a bira y a keda e sosten mas grandi di turismo den e sector Caribense.
Turismo pues ta e ramo economico cu ta depende di duna servicio na hende, cu directamente den turismo ta busca servicio di otro pa e relaha y bandona e mundo di tur dia.
Pa por honra loke e turista ta busca, mester a crea lugarnan di estadia y tambe actividadnan comercial pa entrega na e turista e loke e tabata cumpra cu su placa, cu ta lo mihor di servicio y di tur loke placa por cumpra.
Pa por cumpli cu e exigencianan y demanda di clientenan cu ta hinca nan placa den su negoshi, turismo a bira uno di e inversionnan mas grandi, cu mas exigencia continuo pero tambe mas riesgo cu cualkier otro negoshi.
Na Aruba mas y mas por scucha cu e crecemento turistico mester produci mas placa pa comunidad debi na aumento di su volumen.
Den un economia habri, basa riba negoshi cu ta haci na un pais democratico, tur parti di economia, mester sostene directamente e totalidad di comunidad.
Den e cuadro aki tur pais tin un sistema di belasting, cu ta produci placa pa e pais Aruba, cu Gobierno mester maneha.
Ta na un Gobierno pa dicidi con e ta gasta placa di belasting di un Pueblo y tur instancia comercial di e pais, cu ta participa na economia y ta entrega placa na Gobierno pa atende cu gastonan di e pais.
Ora bisa cu turismo ta produci placa, esaki ta nifica cu mas placa ta drenta den caha di Gobierno cu mester mira kico e ta haci cu placa.
E placa cu turismo ta entrega na belasting pa gobierno maneha e pais, ta bini di hotelnan y otro lugarnan cu ta acomoda turista semper y cuando Gobierno ta eherce su trabou pa percura pa e sistema di belasting ta alcansa tur hende y no tin hende ta sconde pa no paga belasting.
E placa cu turismo ta produci pa caha di Gobierno, ta bini di sueldonan di trahadornan cu ta gana placa y mester paga belasting pa Aruba por sigui funciona.
Produccion di placa di turismo ta bini di compranan enorme cu e hotel mester haci tanto riba mercado local como internacional pa por duna y mantene e grado halto cu servicio ta exigi.
Ora papia di e parti aki mester mira e cama pa turista drumi, e cortina pa evita solo drenta, electricidad y awa pa e turista sobrevivi, e cama, stul, serbete, laken y tur loke ta necesario pa turista por cubri su necesidad humano tambe riba tereno di sanidad.
Hotelnan continuamente mester di mantencion. Taxistanan mester atende cu bon estado di nan vehiculo cu mester ta comodo den un clima tropical.
Restaurantnan mester presenta e mihor servicio. Trahadornan den e hotel, mester laga tur nan problemanan na cas, pa asina entrega e mihor servicio y splica e turista con nan por disfruta di Aruba cu atraccionnan turistico cu ta produci placa.
Na mes momento e empresarionan den turismo mester entrega producto di halto calidad, cu ta exigi placa.
Den e mundo moderno, turismo ta uno di e ramonan economico di mayor riesgo, manera Covid-19 a demostra pa e hotelnan grandi te e tiendanan chikito di Aruba.
DIARIO den combersacion cu informantenan clave, ta topa cu confirmacion di e tendencia actual, cu ta mishi cu e tendencia pa exigi pa turismo entrega mas di e placa cu e ta genera y cu e mester entrega na belasting.
Informantenan ta mustra cu pa baha belasting no por bay mishi cu loke ta produci belasting, pero cu esnan cu ta uza belasting directamente cu ta e aparato gubernamental y cu ta e sector politico riba cual gobernacion ta basa, cu ta existi directamente di produccion di henter comercio y di Pueblo di Aruba!
