Aña Parlamentario nobo lo ta uno cu hopi reto pa haci tur cos positivo pa Aruba

ORANJESTAD (AAN): Diamars mainta, 9 di September, a tuma luga e apertura di Aña Parlamentario 2025-2026.

Na Parlamento, a tuma luga e ceremonia na unda Gobernador di Aruba,  Alfonso Boekhoudt a declara e aña Parlamentario habri. Esaki ta e di 40 Aña Parlamentario di Pais Aruba y e ta un momento hopi solemne pa e organo di mas importante di Pais Aruba.

   Gobernador a duna un discurso balansa na unda cu Gobernador a refleha riba tur loke ta biba den nos comunidad.

   Gobernador a enfatisa cu apesar cu Aruba ta den recuperacion, keto bay Aruba tin retonan y ta solamente trahando hunto y cu e meta central di hiba nos pais dilanti, nos lo crea un futuro miho y mas sostenibel. 

   Varios gobernante ta premira un Aña Parlamentario nobo cu hopi reto, specialmente loke ta pasando geopoliticamente, pero e lo por ta sumamente fructifero y positivo pa Aruba. Un aña na unda cu tin decisionnan importante cu mester tuma riba tereno financiero.

   DIARIO ta desea tur parlamentario hopi exito y sabiduria y tambe hopi pasenshi den e Aña Parlamentario aki, como cu den sala di Parlamento e decisionnan grandi pa nos pais ta worde tuma. Mas uni nan ta, mas nan ta logra pa e pais. E potretnan cortesia di Ministerio di Mike Eman, Gerlien Croes, y Geoffrey Wever.