Purba di elimina problema di cacho
ORANJESTAD (AAN): E problema di cachonan agresivo riba caya, of cu ta logra bula sali di cura y ataca hende, ta hayando atencion completo ultimo temponan door di Centro di Control di Cacho, conoci como CCC.
Centro di Control di Cacho ta situa na Wayaca 128-A y nan tin un horario di Dialuna pa Diabierna, di 8:00 am te cu 12:00 pm. Pues despues di e oranan ey, un suplica ta bay na tur hende pa no bandona nan mascota dilanti CCC. Bo tin di siña di ta un doño responsabel pa bo mascota.
E lugar mas cu claro no ta suficiente grandi pa atende e cantidad di cacho cu nan ta analisa y vigila eyden pa mira kico por haci cu nan agresividad.
Den un entrevista cu Nathy Ventura di CCC, el a confirma cu pais Aruba ta buscando un lugar nobo y mas espacioso pa Centro CCC bay ubica su mes aden. Tin informacion alentador cu kizas nan lo muda pa un adres na Kibaima.
E meta ta pa e edificio wordo uza pa e cachonan aki haya un ‘solucion temporal’. Ta dificil cu no tin e suficiente manpower ni e productonan cu tin pa haci un limpieza grandi, pero aworaki tur ta yudando. Si tur hende na Aruba bira mas responsabel, tur por duna di nan banda. Pasobra hopi di e cachonan aki no ta di caya, pasobra nan ta animalnan cu tabatin doño, of e doño a laga nan bruy, y ta uza cualkier pretexto pa benta nan riba caya.
Si cada persona tuma e responsabiliza pa steriliza nan na tempo (den seis luna ya un cacho hembra ta cla pa wordo opera). Pero tin ora ta haya storia cu hendenan ta kere den mito cu un ‘cacho mester werp puppies por lo menos 1x biaha pa e no bira malo’. Esey ta un storia cu ta nada berdad.
“Un cacho cu ya tin 6 luna bieu, por wordo opera caba, y e lo keda un animal sano pa resto di su bida,” Nathy Ventura di CCC a declara. El a splica cu un cacho macho tambe tin hende ta kere cierto mito, esta cu como cu e ta un cacho macho, “no mester castr’e”. Esaki tambe ta incorecto, pasobra abo como doño no tin un hembra den cura pa nan dek. Pero otro hende (kizas bisiña) si. Anto corda cu cacho macho por hole di leu ora cu un cacho hembra ta loops.
Tambe a haya caso na Aruba, unda doño ta orguyoso cu e tin un cura halto y nada lo pasa. Pero ata e cacho a siña logra bula, y bay haci su cosnan cu otro animalnan eybanda. “Esey ta cosnan cu sa pasa,” Ventura a indica.
Pues unico cos cu Centro di Control di Cacho ta pone enfasis riba dje ta como lo siguiente:
(1) Educacion: Pa doño sa con pa tene cacho den bo cura corectamente, no djis mara na un cabuya cortico, sin afdak, sin awa, y sin cuminda. Tambe con pa cuida e cuero di bo cacho, pasobra ta mira hopi doño cu cacho den cura, pero e curpa ta yena cu carpata. Anto pesey diripiente e doño no kier cacho mas. Siendo cu por djis duna nan mascota un pildo, y den 24 ora ta tur carpata a muri. (2) Comportacion: Hendenan ta elimina nan mascota door di tira nan den mondi, of benta nan den bario unda tin mucha y hendenan adulto mayor ta cana riba caya.
Segun Nathy Ventura, esey ta e raiz di problema, unda doñonan no kier asumi responsabilidad y ta cla pa pusha esaki riba lomba di otro. Si nos tur realiza cu ora bo kier tin un mascota, pa bo siña bira un persona responsabel, pasobra si tur hende pone nan granito di tera hunto, e problemanan aki na Aruba lo bay pasa pa pasado.
