Manera DIARIO a adverti prijs di petroleo a cende pagara peligroso - OPEC ta mantene strategia y prijs di petroleo lo aumenta tur prijs - Problema comercial y social ora Gobiernonan scrap asistencia Covid-19
ORANJESTAD(AAN)- Dialuna e noticia cu henter mundo por a spera a drenta. Informacionnan cu DIARIO durante mas cu un luna tabata anuncia, a wordo confirma na final di e reunion di e paisnan productor di petroleo, cu no ta dispuesto pa subi nan produccion sin mas y asina evita cu prijs di petroleo ta subi tur prijs na mundo.
Cifranan cu DIARIO a compila ayera pa ofrece na Aruba hunto cu informacionnan responsabel pa asina Aruba por ta prepara pa entrada na 2022, ta mustra cu e paisnan productor di petroleo lo no ahusta nan produccion manera a wordo solicita pa asina cumpli completamente cu e demanda y evita prijs di petroleo di subi y asina subi tur prijs na mundo.
Mundo ayera sigur tabata na careda ora a bira conoci, cu prijs di petroleo lo a bira 81 Dollar pa baril y asina e prijs di mas halto cu a wordo registra for di 2018.
Diferente aspecto serio a bini dilanti ayera na momento cu paisnan productor di petroleo a mustra cu nan ta aumenta nan produccion na un forma cu ainda ta laga un demanda halto pa petroleo.
Inflacion y loke e lo bira mundialmente, tabata e problema mas grandi cu e reunion di OPEC a entrega na mundo, cu mester tene na consideracion cu na entrada di 2022, e ta den un crisis serio causa pa e prijs di petroleo cu ta haci cu tur prijs ta subi na momento cu rond mundo gobiernonan ta prepara pa e normal nobo despues di Covid-19.
DIARIO ayera a realisa investigacion riba tur asunto cu lo bay afecta Pueblo di Aruba, cu por a sobrebibi e Pandemia Covid-19 te awor, debi na e medidanan cu Gobierno a tuma y e yudansa cu Aruba a ricibi di Hulanda.
Manera DIARIO a mustra semper, e medidanan cu Gobierno di Aruba a tuma na momento cu mester a cera porta pa turismo y asina economia, tin un caracter unico.
Den un situacion normal, Gobierno no ta duna empresanan placa pa mantene trahadonan na trabou ni tuma otro medidanan cu no ta cuadra cu e caracter liber di comercio cu no ta responsabilidad di Gobierno pa loke ta trata nan produccion financiero.
Den e caso aki, a duna empresanan placa pa tene trahadornan na trabou mientras economia ta recupera.
Entrada na belasting di e pais, fondonan manera di AZV y SVB a sufri a base di nan caracter cu ta depende di pago a base di entrada.
Normalidad na un pais democratico ta encera cu e ta bolbe na un situacion den cual tur sector tin nan propio responsabilidad.
Den planificacion mundial, e prijs pa energia (petroleo, carbon, electricidad, gas), a wordo calcula y tabata conoci cu e produccion a baha tempo di Covid-19 hunto cu produccion comunitario na paisnan.
E demanda mundial a bolbe crece na 2021 pero e paisnan productor no a aumenta nan produccion na e proporcionnan nobo loke lo a nivela e demanda cu e produccion.
Den e situacion aki e prijs di petroleo ta bay halto y ta afecta tur prijs di tur producto na mundo, cu lo conoce situacionnan economico, financiero y social sumamente dificil.
Inflacion lo haci su entrada na momento pues cu e pais lo mester bolbe na su normalidad sin asistencia di Gobierno y tambe asistencia special por ehempel di Hulanda.
Na Hulanda mes partidonan ta papia di bay haci un prestamo pa por confronta e problemanan financiero mientras rond mundo gobiernonan ta den problema serio.
DIARIO mester prepara Pueblo di Aruba pa loke ta spera mundo riba un termino cortico y lo afecta tur loke rond mundo ta costa placa.
Mientras fin di 2021 ta acerca y Dianan di Fiesta ta yega mas cerca, mester tene na consideracion tanto e realidad di Covid-19 cu no a desaparece pero tambe e hecho cu peso di bida lo aumenta rond mundo cu ta drenta un crisis nobo.
