ORANJESTAD (AAN): Siman pasa tabatin algun momento di hopi awacero na Aruba. E ta un alivio pa hopi, pero un preocupacion pa otro.
Corda cu awacero ta pone cu webonan poni den pasado door di sangura, ta bruy awo si. Cu aumento di sangura, bo por haya aumento den caso di Dengue, pero tambe corda riba Zika y Chikungunya.
Recien a sali publica informe cu na departamento di La Guajira cu ta keda na e parti di Colombia cu ta apenas par di kilometer pabao di Aruba, tin varios caso di Dengue registra, y hasta mucha a muri di dje.
Den caso di Dengue esaki por ta grave te hasta fatal pa cierto hende cu a haya Dengue den pasado caba. Chikungunya no ta peligroso pero si hopi doloroso y su efectonan por dura pa hopi aña. P’esey ta hopi importante, como comunidad henter, pa nos uni contra transmision di e malesanan aki.
Nos por haci esey door di kita of deshaci di tur awa cu ta para y cu por bira un criadero di sangura. Cana rond di cas y bolter tur loke ta wanta awa, controla den cas tambe pa obheto cu tin awa para. Na momento cu bo ta riba caya sea alerta di bo alrededor, si bo ta tuma nota cu na un luga publico tin hopi sangura bo por tuma accion y yama GKMB pa raporta esaki.
Zika ta un di e malesanan cu tambe ta worde transmiti pa e sangura Aedes aegypti y cu por tin consecuencia grave pa desaroyo di e baby cu ta den bariga di su mama. Zika por worde transmiti door di pica di un sangura infecta, pero tambe door di contacto sexual di e homber cu tin Zika pa un hende muhe prome of durante embaraso.
P’esey ta di gran importancia pa comunidad henter yuda deshaci di tur criadero pasobra na final di dia e por afecta cada uno di nos. Nos tur tin un familiar of conoci cu ta na estado y cu mester pa nos yuda proteh’e y su baby.
