Comentario:
Skirbi pa Mercedes Monge
Danki Dios Aruba ta un pais pacifico y politicamente trankil, y cu e diferencianan di opinion cu por tin entre e gobierno y oposicion, locual ta normal, nos pueblo no ta biba meymey di un caos, of un peligro inminente di desestabilidad politico, etico, moral y social.
Pero aunke nos ciudadanonan no ta vocifera nan opinion di locual ta pasa rond di nos isla, na Merca, y den casi henter Latino America (Sur y Centro America), esaki no ta nifica no nos pueblo ta indiferente na esaki, y cu no tin preocupacion pasobra nos sa cu Aruba, alomenos comercialmente, ta depende di diferente di e paisnan di nos region.
E palabra “discurso politico” ta wordo hopi scucha e dianan aki, por ehemplo den e noticieronan cu nos tin acceso directo via canalnan di, por ehemplo, Colombia, y canalnan manera Univision, cu tin sede na Merca y cu ta yega nos for di Mexico mes.
No por kita afo cu na Aruba tin hende preocupa pa e manifestacionnan cu ta tumando lugar na Merca, na Washington y na Miami tambe. E capital di Merca y un ciudad hopi bishita pa cantidad di nos famianan local den tempo di vacacion escolar, y sigur pa nos comerciantenan. Unda cu tin manifestacionnan, na dado momento tin violencia, confusion, y hasta por tin amenaza di arma.
Si tira un bista riba e sucesonan na Colombia, despues di un tempo largo di calma cu hopi hende tabata bishitando Medellin, Bogota, Bucaramanga, entre otro, na e momentonan aki no solamente fenomenonan natural manera temblornan fuente, y derumbe di tera, pero tin cu suma, lamentablemente, e atakenan 'guerrillero', cu a lanta cabes fuertemente atrobe.
Ta tristo pa sa cu un hoben di apenas 15 aña a atenta contra e bida di un congresista y pre-candidato na e presidencia di Colombia, y cu tin full un grupo terorista su tras. Tampoco ta agradable scucha discursonan politico plama di insulto y cu yamado na un pueblo pa sali caya, pa logra cu violencia pa un ley, cu aparentemente no a gana simpatia, wordo aproba.
Tur esaki ta pasando den nos cercania geografico, cerca Aruba su awanan teritorial. Y si nos bay un tiki mas leu y nos bista yega te na Centro America, e situacion politico tampoco ta mustra generoso. Kico ta pasando den parti di nos region? Ami ta comparti e temor cu ta reina cerca diferente ciudadano local y residente. Ta hopi oracion nos mester eleva na Dios, pa Aruba nunca wordo afecta pa ningun di e tormentanan aki di indole politico, etico, moral y di violencia cu a desata rond di nos Isla, causa nos daño. Ami, y mi ta sigur cu nos tur, ta gradici cu Aruba ta un pais stabil, y bendiciona. Dios proteha nos lugar!
