Cu participacion di Aruba
ORANJESTAD (AAN): Den cuadro di e actividadnan di P.I.S.T.A (Perspectivas Institucionales y Sociales sobre la Trama de Archivos)), un proyecto multidisciplinario cu ta stimula investigacion, conservacion y creacion di arte basa riba archivo y memoria historico, auspicia pa red EUNIC (EU National Institutes for Culture) y otro paisnan asocia, a tuma luga dia 12 di juni cu un mesa importante di trabao bao e nomber “Los archivos historicos entre Venezuela y las Antiyas”, na Museo Arzobispal di Coro, Venezuela.
E evento a conta cu e sosten di Embahada di Reino Hulandes y Goethe-Institut.
Na e sesion aki, Archivo Nacional di Aruba tabata un di e invitadonan y su director, Dr. Raymond Hernandez, a participa on-line.
E mesa a consisti di e siguiente expertonan: Dra. Elina Lovera Reyes, Maestra Olivia Hernández, Lic. David Chacón, Arq. Alberto Moryusef y Lic. Luz Dovale, directora di Archivo Historico di Estado Falcón-UNEFM. E moderacion tabata na man di Dr. Blanca De Lima.
Blanca De Lima a conta den entrevista cu DIARIO cu durante e discusionnan, e grupo di expertonan den historia regional di estado Falcon y e islanan a trata topiconan di gran importancia, manera: e presencia di documentonan relaciona cu Aruba y Corsou den archivonan historico di estado Falcon, 'Archivo General de la Nacion' na Caracas y Archivo di Indias na Sevilla, Spaña; e necesidad di mas investigacion cu un bista geo-historico pa e region cu antes tabata forma e provincia di Coro y Antiyas Hulandes; y futuro di archivonan historico den forma digital, visibilidad online, humanidad digital y registronan digital.
Tambe a destaca e oportunidadnan cu e interes global creciente pa patrimonio historico cu e memoria ta ofrece, cu por yuda elimina debilidadnan, enfrenta menasanan y fortifica e fortalesanan di e institucionnan.
Un mesa di trabao cu tabata exitoso, yen di historia, memoria y conexion intercaribense cu ta habri caminda pa mas colaboracion entre e regionnan, De Lima a indica.
