Ambicion di Aruba como pais y di gobierno ta pa trece e nivel di energia renovable na 50% na 2030

Alberto Koolman director WEB:

ORANJESTAD (AAN) –Alberto Koolman, director di WEB Aruba NV, den conferencia di prensa relaciona cu e construccion di e di dos parke di mulina, tambe a duna su comentario, den cuadro di e vision di Minister Glenbert Croes.

El a subraya cu e combustible HFO (heavy fuel oil) ta emiti hopi gas cu ta dañino pa Aruba su medio ambiente, y den transcurso di tempo tabata tin esfuerzonan haci pa WEB Aruba NV pa baha e dependencia di azeta. Esey nan haci na un nivel di 6.200 pa 4.100 bari durante e ultimo decada y mey.

Cu e ultimo motornan cu WEB a introduci cu a drenta operacionalmente na Juni, e lo disminui te 3.900 bari pa dia. El a subraya cu ta asina cu pa disminui e emision di gasnan dañino pa Aruba su medio ambiente (CO2) mester reemplaza e HFO y conhuntamente e companianan, Utilities Aruba y Gobierno a opta pa e opcion di gas natural, y esey lo conduci na disminucion di CO2 cu mas of menos entre 30 cu 45%, loke ta coresponde cu loke Minister di Energia tambe a splica.

Koolman a subraya cu e gas natural ta bay tin impacto akinan, y WEB ta bay uza e combustible aki na e motornan di fase 4 cu a bay operacional na Juni ultimo. Di e manera aki lo impacta e emision di CO2 y tambe cu esey e compania ta cumpli cu e acuerdonan internacional.

Señor Koolman a bisa cu pa loke ta trata e transicion, esey no ta suficiente pa locual ta e ambicionnan di Aruba como pais y di e minister (gobierno).

Pesey, mester bay expande e opcion di energia renovable, cu ta netamente loke a wordo menciona prome, cu ta e construccion di e di dos parke di mulina di biento na e sitio di Rincon.

El a señala cu pa aña 2030, e ambicion di Aruba como pais y di gobierno ta pa trece e nivel di energia renovable na 50%. Esaki tin su retonan cune, manera sr. Rojer a splica tocante e asunto di tereno. Esaki pasobra Aruba ta un isla chikito y no por crece den superficie “pero esey nos lo deal cune, pa asina nos realiza e di dos parke di mulina di biento na Rincon” Koolman a expresa.