Indice di Prijs di Consumo (CPI) pa luna di Juli 2022
ORANJESTAD (AAN): Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Juli 2022.
E CPI pa luna di Juli 2022 ta 104.46, loke ta representa un subida di 1.2% compara cu e indice
di Juni 2022 (103.26) y acumulando un subida di 3.8% te cu na Juli di e aña aki.
E cambio di e CPI pa e ultimo diesdos (12) lunanan (Juli 2021 te cu Juli 2022) ta 6.0%, un subida
di 4.2 punto di porcentahe (ppt) compara cu e periodo corespondiente di aña pasa (1.8%).
E promedio anual (ultimo 24 luna) di e tasa di inflacion pa e periodonan di Juli 2020 te cu Juli
2021 y Juli 2021 te cu Juli 2022 ta 3.7%, un subida di 5.1 ppt compara cu e -1.4% registra den
e periodonan di Juli 2019 te cu Juli 2020 y Juli 2020 te cu Juli 2021.
Durante e luna aki, ocho (8) di e diesdos (12) sectornan a registra subida di prijs. E subidanan
cu tabata tin e mayor efecto riba e CPI a wordo registra pa e sectornan di “Transporte ” (3.7%)
y “Recreacion y cultura” (4.5%), causando un efecto di 0.56 y 0.42 ppt, respectivamente. E
subidanan den e sectornan restante a contribui cu un efecto di 0.35 ppt riba e CPI di Juli 2022.
E subidanan aki a wordo contraresta parcialmente door di principalmente un caida den e
indice di e sector di “Mobilario” (-1.5%) cu a contribui cu un efecto di -0.14 ppt riba e CPI di
Juli 2022. E caidanan den e sectornan restante a contribui cu un efecto di -0.03 ppt riba e CPI
di Juli 2022.
E subida den e sector di “Transporte” a wordo causa door di principalmente un subida den e
categoria “Gasto relaciona cu uso di vehiculo di transporte personal” (3.3%), causando un
efecto di 0.33 ppt. E subida den e sector di “Recreacion y cultura” a wordo causa
principalmente door di un subida di 6.9% den e categoria “Vacacion”, causando un efecto di
0.18 ppt.
E caida den e sector di “Mobilario” a wordo causa principalmente door di un caida den e
categoria “Mueble y accesorionan, tapijt y otro tipo di material pa vloer” (-19.3%), causando
un efecto di -0.22 ppt.
Canasta di consumo
E canasta di consumo di e CPI ta consisti di 408 bienes y servicionan. Compara cu Juni 2022,
53.2% di e bienes y servicionan aki a conoce un aumento di prijs causando un efecto di 1.73
ppt, mientras cu 30.1% ta mustra un caida di prijs, cu a contribui cu un efecto di -0.57 ppt y pa
e restante 16.7% no tabata tin cambio den prijs.
Prijsnan di bienes a subi cu 1.6% y a causa un efecto di 0.96 ppt. Prijsnan di servicionan a subi cu 0.5% y tabata tin un efecto di 0.21 ppt riba CPI di Juli 2022.
Core inflation
E CPIC (core inflation) - CPI excluyendo e efecto di energia y cuminda - a registra na Juli 2022
un subida di 2.2%. E indice di energia - cu ta consisti di e productonan: electricidad, awa,
gasolin y diesel a registra un subida di 9.5%. E indice di cuminda a registra un subida di 6.1%.
