Amazonanan di Aruba a conkista varios premio na Colombia

ORANJESTAD (AAN):  Den e ultimo weekend, un delegacion di amazona di Aruba a competi den e Valida Clasificatoria organisa pa ASOCABA na Medellin, Colombia.

E amazonanan cu a representa Aruba ta Zaria de Groot den categoria di Infantil A 9-11 aña, Mia Rose Tromp den categoria Junior A 12-14 aña, Xielle Koolman, Abigail Wong y Xyselle Dijkhoff den categoria Juvenil A 15-17 aña.

            Akinan Xyselle a clasifica den e top 8, pero a keda net cortico pa un di e 6 premionan. Sarah Toet a competi den categoria Aficionadas 1 A caminda el a obtene un tercer puesto.           Genesis Pietersz a competi den categoria Aficionadas 2 A unda el a  logra un cuarto puesto, y Lea Vink a competi den Aficionadas 3 A caminda el a keda premio cu un tercer puesto.     Casi tur amazona a competi riba cabaynan cu nan no conoce, locual a haci nan resultado mas impresionante y ta demostra nan habilidad pa adapta na cualkier tipo di cabay cu nan haya.

            E amazonanan lo ta kedando na Colombia algun dia mas pa asina participa tambe den un 'trainingkamp' pa sigui desaroya nan habilidad y haya mas experiencia.