Alydia Wever a presenta su exposicion “Mi no tin palabra” den Centro di Actividad Rancho

Un idea cu a nace den e pandemia: -  ORANJESTAD (AAN) -- E artista multidisciplinario Alydia Wever, a presenta su exposicion “Mi no tin palabra” (No words available), den e Centro di Actividad Rancho.

E artista a comenta, den un entrevista cu DIARIO, cu e idea a surgi aña pasa y cu esaki ta un concepto cu a nace den e tempo cu nos ta bibando aworaki, cu yama “Pandemia di Covid-19”.

E dama a splica cu esaki ta un expresion, un forma pa mira e bida, e parti spiritual, e problemanan, e tematica, e dolor, e hamber, e sudor, tur loke ta pasando cu e ser humano riba e isla aki, den un forma cu Alydia, cu ta bibando afo (Hulanda), a realiza cu e ta un problema hopi grandi, cu no ta afecta e personanan biba aki so, pero ta afecta tambe esnan cu ta biba afo, cu no ta compronde tampoco unda e problema aki ta bay, kico ta bay pasa, unda nos ta cuminza, ki plan ta bay tin, con nos ta bay yuda den e situacion aki, for di caminda di nos curazon.

“Mi sa cu ta facil pa bisa cu e Organo mas grandi riba nos Isla tin cu haci esey, pero ta nan deber. Un pueblo ta pone un gobierno sinta, pero e gobierno tambe mester scucha su comunidad, su hendenan di berdad. No scucha nan, anto despues di tres dia ta haci algo cu otro, hasta pensa pa e pueblo. Nan mester scucha pueblo pa nan por dicidi hunto kico pa haci den un situacion asina”, Alydia a splica.

Covid a pone Alydia realiza y wak e cosnan diferente. Locual el a haci pa su mes ta “bay paden pa e bin pafo”. Asina el a expresa.

Su exposicion ta consisti di diez potret cu ta refleha locual e ta sinti paden y e Instalacionnan ta refleha loke ta externo.

“E persona ta sinti y ta purba di yega na drecha y compronde e situacion pa e por trece un miho calidad di solucion y un miho bida. Y tambe, nos no por lubida e Planeta y pakico e Covid a pasa.

“ Covid no a pasa door di Covid e malesa. Ami ta mira cu Mama Tera a dicidi ‘ta basta’! Bo no kier scucha, esaki ta pasa. E ta afecta e tera, e medio ambiente, el a yega te afecta e ser humano y esey ta pasando”, e artista a señala.

El a subraya cu e no kier bisa cu mester kere loke e ta bisa, pero si reflexiona riba esey. “Mi ta asina contento cu mi a haya e chens di bin mi Isla di dos aña pa mi duna algo bek, manera semper mi ta bisa. Pa mi por yuda Atelier, pa mi por yuda Centro di Actividad Rancho, pa mi por yuda nos hobennan, pa mi por trece sikiera un idea, un creatividad, un momento den hende su bida pa por sinti loke ami a sinti y comparti su sentimentonan cu mi tambe”, Alydia Wever a expresa.