ORANJESTAD (AAN) – Sharline Farro, den nomber di Organizacion di Enfermeronan di Aruba (ODEA), cu ta otro di e stakeholders cu cual Formador Wever-Croes a reuni, a trece dilanti den conferencia di prensa con e encuentro aki, cu Formador, a bay.
Sharline Farro a comenta cu a trata di un reunion basta ameno, cu hopi pregunta, y ODEA a trece tur su puntonan di preocupacion dilanti, pa por guia Formador den e formacion di gobierno.
“Nos tin hopi preocupacion, pandemia a laga nos cu mas preocupacion. Nos a bin cu proposicionnan tambe. Tabata tin hopi pregunta, pero nos ta hopi satisfecho pa e oportunidad y mi ta confia tambe cu e lo no keda na un encuentro.
E encuentronan aki ta hopi importante, pasobra a base de dialogo y participacion di e “beroepsoganisatie” (Colegio Profesional), den e caso aki ODEA como representante di enfermeronan ta hopi importante, specialmente den e parti di AruBIG.
ODEA a tuma nota cu AruBIG ta bay drenta, pero e enfermeronan no ta aden, y nan ta haya cu nan mester di participacion den esaki y nan ta sinti cu tur hende ta di acuerdo cu ODEA.
“Nan a comparti nos puntonan di preocupacion, a reconoce y ta na haltura di dje, y esey ta duna nos un satisfaccion cu nos ta riba un line eynan, pa por cuminza traha den e proximo gobernacion pa trata na resolve e problemanan aki, cu nos tin y nos inkietudnan.
“Mas cu claro, ODEA ta conoci tambe pa bin cu solucion; nos a bin cu proposicionnan y a entrega tur documento, con y na unda ODEA lo mester yuda sin mester reinventa e wiel y haci cambionan hopi grandi den logra e metanan cu nos a propone”, Sharline Farro a señala.
