Alumnonan di La Salle College a bay yuda haci costa limpi

ORANJESTAD (AAN): Recientemente, La Salle College a organisa un limpiesa di lama na e Duinen di Sasarawichi,

un area protehi cu ta cay bao di maneho di Aruba Conservation Foundation (ACF), como parti di nan tema anual di duna bek na comunidad. E actividad aki no solamente ta yuda preserva nos medio ambiente, pero tambe ta duna e studiante e oportunidad pa desaroya habilidadnan importante, manera traha den grupo, comunicacion, perseverancia y soluciona problema.

   Fundacion ACF ta aplaudi La Salle College pa nan dedicacion pa kita sushi y desperdicio marino di  costa y asina crea mas concientisacion riba e rol importante di nos sistema ecologico di costa cu ta inclui nos lama y duinen.

   E sistema ecologico di lama y duinen na e area di Sasarawichi ta fungi como area di cria pa entre otro especienan bou menasa y den peliger manera e turtuga di lama, Shoco, Sternchi, Patrishi, y e Coneu. Tambe tin hopi bestianan chikito manera insecto, crab, cabaron etc. den e area cu ta establece su mes como un fuente di cuminda pa parha y otro especienan manera e Warawara y Kinikini. Aruba su famoso Cododo blauw ta un habitante comun den e area aki mientras cu algun flora ta inclui e Banana di Rif, Mata di Druif, y cadushi manera Breba, Tuna, y Bushi.

   Corda, ora di bishita e sistema ecologico senstivio aki, bay poco poco y comporta bo mes den un manera responsabel mientras bo ta goza di naturalesa.

   Fundacion ACF ta manda palabra di danki na La Salle College, pa e compromiso cu preservacion di Aruba su tesoronan natural.