Alonso Tromp ta e presidente nobo di TOPA

ORANJESTAD (AAN) – Diamars 31 di Mei, entre 730’or pa 8.20’or di anochi, a tuma lugar e acto di votacion pa elegi un Presidente y un Hunta Directiva nobo, pa e Sindicato TOPA.

E evento aki a tuma lugar na Piedra Plat Entertainment Center, y basta empleado publico cu ta wordo representa pa TOPA tabata presente y a haci uso di nan derecho di voto.

Señor Alonso Tromp a wordo elegi como e Presidente nobo di TOPA. Kiermen, e ta bira TOPA su lider sindical. Un total di 208 votador a eherce nan voto di cual tres tabata nulo. E otro candidato, Maria, a haya 58 voto, y Tromp a haya  147 voto.

Den entrevista cu DIARIO, Alonso Tromp a expresa cu nan ta hopi contento cu e resultado, y cu e lo no laga e miembronan cay tampoco pero sigur, lo defende nan.

E miembronan por spera aire fresco, aire nobo, transparencia, democracia y defensa. “Nos ta sigur cu nos ta bay defende cada miembro di TOPA, di cual cada miembro ta ambtenaar of trahadornan di Stichting, pensionado, of personanan cu ta cu vut. Di tur e personanan ey nos ta sali na nan vanguardia” Tromp a señala.

Alonso Tromp a agrega cu ta bay haci un sondeo pa wak con e status di TOPA ta, na e momento aki, y despues lo yama un Asamblea den cual lo anuncia e resultado di e sondeo y laga e Congreso dicidi kico ta bay haci cu e informacion.