Director di ANA Raymond Hernandez:
ORANJESTAD (AAN) – Archivo Nacional Aruba hunto cu Minister di Finanzas y cultura, a yama un conferencia di prensa, pa presenta e programa di celebracion di e Siman di Archivo.
E director di ANA, señor Raymond Hernandez, a expresa cu esaki ta un mainta hopi special, unda nan a presenta e programa cu nan tin planea pa e Siman di Archivo.
Hernandez a splica cu e Dia Internacional di Archivo ta wordo celebra dia 9 di Juni y “International Council on Archives” ta pidi tur instancia di archivo, pa dedica e dia aki na e trabao di archivistanan; pero e ultimo cuater añanan nan kier pa dedica nan henter un siman. “Nan kier haci enfasis cu Archivo ta: 1 e hendenan cu ta traha cu archivonan, pues nos cu ta haci e trabao aki pa conserva informacion y documentonan, pa asina despues por wordo uza pa nos haya sa y reconstrui nos pasado, pero na mes momento, nan ta uza esaki como un ‘reaching’ pa comunidad pa mustra cu no ta solamente nos cu ta traha den archivonan, mester ta responsable pa esaki, pero henter e sociedad civil. E comunidad mester reconoce cu documentacion, informacion, ta algo masha importante pasobra e ta conta nos historia, bo historia. Pesey mi ta contento cu nos por haci esaki tambe aki na Aruba. E bishita di Minister, ora cu el a bin sera conoci cu nos na Februari, nos a papia riba e aspecto di nos trabao, entre otro, e reconocimento cu nos ta sinti cu ta haci falta ainda den nos comunidad, pa e trabao di archivo”, Raymond Hernandez a señala.
Eynan a bin e idea cu ANA mester haci un tiki mas promocion, kiermen mustra nan mes mas ainda, y tambe a bin na e idea pa e Ministerio di Cultura duna ANA e sosten pa organiza e Siman di Archivo.
El a agrega cu dia 9 di Juni ta wordo reconoci door di Nacionnan Uni, como Dia Internacional di Archivo, y tambe riba e SDG’s ta wordo papia hopi riba esaki, unda cu den e parti 16 ta bisa cu “informacion ta algo hopi importante pasobra e ta crea e base pa un comunidad cu derecho igual pa tur hende, pero tambe e ta enfoca riba e transparencia necesario pa nan tin bon institutonan di archivo den cada pais”.
Director di ANA a haci uso di e oportunidad pa lanza un campaña di concientizacion pa e ciudadanonan trece documentonan y materialnan historico, pa Archivo, cu ta bira parti di Aruba su herencia cultural despues.
